རྫོང་གསར་མཁྱེན་བརྩེ་རིན་པོ་ཆེས་བརྩེ་བ་དང་འབྲེལ་བའི་སྐོར་།

 

གུས་ནས་ནང་ཆོས་སྐོར་ཤེས་ཐབས་བྱེད་སྟངས་གཅིག་ནི་བླ་མ་ཁག་ནས་དབྱིན་སྐད་ཐོག་གསུང་ཆོས་སོགས་གནང་བ་དེ་ཚོར་ཉན་ནས་གོ་བ་ལེན་ཐབས་བྱེད་པ་དེ་ཡིན། དེ་ཐོག་རྫོང་གསར་མཁྱེན་བརྩེ་རིན་པོ་ཆེ་ནས་བཀ།འ་གནང་བ་དེ་ཚོ་བློ་ལ་འཇུག་པོ་ཡོང་གི་འདུག

རིན་པོ་ཆེས་སིང་ག་པོར་བརྩེ་བ་དང་འབྲེལ་བའི་སྐོར་མང་ཚོགས་ལ་བཀའ་གནང་བ་འདི་བརྒྱུད་ནང་ཆོས་ཀྱི་སྙིང་པོ་རྣམས་ངོ་སྤྲོད་ལེགས་པོ་གནང་གི་འདུག ཁོང་ནས་རང་ཉིད་དཔྱད་ཞིབ་ཀྱི་རྒྱུ་བཟོས་ནས་འགྲེལ་བརྗོད་གནང་སྟངས་ལ་གཟིགས་དང་།

 

Advertisements

ག་པ་ཕེབས་ཀྱི་ཡོད་དམ། མང་ཚོགས་ཀྱི་བཤད་སྲོལ་ལ་དཔྱད་པ།

སྤྱི་ཚོགས་ནང་རིག་གཞུང་དང་ཁོར་ཡུག་འདྲ་མིན་ཡོད་རྐྱེན་མི་མང་དབར་འབྲེལ་བ་གནང་སྟངས་ཡང་དེ་མཚུངས་སྣ་ཚོགས་འདུག དཔེར་ན་མི་ངོ་ཤེས་གཉིས་ལམ་དུ་མཇལ་བ་ཡིན་ཚེ་ཁོང་གཉིས་དབྱིན་སྐད་སྐྱོན་མཁན་ཡིན་ན་ “ཧའོ་ ཨར་ཡུ་” ཟེར་ཞིང་། ཐད་སྒྱུར་བྱེད་ན་”ཁྱེད་རང་གང་འདྲ་ཡོད་”དང་གོ་དོན་གྱི་”ཁྱེད་རང་གཟུགས་པོ་བདེ་པོ་ཡིན་ནམ་”ཟེར་བ་དེ་རེད། ཡང་དབྱིན་སྐད་ཐོག་དེ་ལས་ལེགས་པ་གསུངས་མཁན་ཚོས་ “ཧའོ་ ཌུ་ ཡུ་ ཌུ་” གསུངས། དེ་ཐད་སྒྱུར་བྱེད་ན་”ཁྱེད་ནས་གང་འདྲ་གནང་གི་ཡོད་དམ་”ཟེར་རུང་གོ་དོན་དུ་བདེ་པོ་ཡིན་ནམ་ཡིན། འོན་ཀྱང་དེའི་ལན་དུ་”བདེ་པོ་ཡིན་”གསུངས་སྲོལ་མེད། ཕར་ཡང་ “ཧའོ་ ཌུ་ཡུ་ ཌུ་” གསུངས་དགོས་ཡོད། དེང་སང་ནུབ་ཕྱོགས་པ་གཉིས་མཇལ་བ་ཡིན་ན་ཕལ་ཆེར་ “ཧེ་ལོ་” འམ་ “ཧ་ཡེ་” བརྗོད་ཀྱི་རེད།

བོད་མི་ཡིན་ན་ཁག་གཅིག་ནས་”བདེ་མོ་”བཤད་སྲོལ་ཡོད་འདུག འོན་ཀྱང་”ག་པ་ཕེབས་ཀྱི་ཡོད་དམ་”ཡང་འདྲི་སྲོལ་ཡོད། དེ་ནི་ཕལ་ཆེར་རྒྱ་གར་བའི་གཤིས་ཀ་ཡིན་ས་རེད། དྲི་བ་འདིར་བོད་མིའི་ནང་རྣམ་རྟོག་མེ་རུང་ནུབ་ཕྱོགས་པ་ལྟ་བུ་ཡིན་ན་སྒེར་གྱི་གནད་དོན་ལ་བྱུས་ཏོག་བྱེད་པ་ལྟ་བུར་འཚོར། ཡང་བོད་མིའི་དབར་དྲི་བ་འགའ་ཞིག་ལ་ལན་ཧ་གོ་བཞིན་དུ་འདྲི་སྲོལ་ཡོད། དཔེར་ན་ཕྲུ་གུ་ཞིག་ནས་སློབ་གྲའི་སྒྲིག་ཆས་གྱོན་ཞིང་དེབ་ལག་ཏུ་འཁྱེར་ཡོད་བཞིན་དུ་”སློབ་གྲར་འགྲོ་གི་ཡོད་པས་”ལྟ་བུ་དང་། གཞིས་ཆགས་ནང་རྒན་པ་ཞིག་ཆུ་རླུག་ཆེད་གནོད་འཁྱེར་བ་ཞིག་ལ་”ཆུ་ལེན་དུ་འགྲོ་གི་ཡོད་དམ་”སོགས་འདྲི་བ་ལྟ་བུ་རེད། དེང་བོད་མི་མང་པོས་ཕན་ཚུན་མཇལ་སྐབས་བཀྲིས་བདེ་ལེགས་གསུངས་ཀྱི་རེད། སྐུ་གཟུགས་བདེ་པོ་ཡིན་ནམ་འདྲི་རྒྱུ་དེ་དེ་རྗེས་གནང་གི་རེད། འབྲུག་པ་ཚོ་ཡིན་ན་རྒྱུན་དུ་ཕན་ཚུན་མཇལ་དུས་ཐོག་མར་སྐུ་གཟུགས་བཟང་པོ་ཞུ་བ་དང་ལས་དོན་ཞིག་ཐོག་འཚམས་འདྲི་ཞུ་དགོས་ན་གཞི་ནས་བཀྲིས་བདེ་ལེགས་ཞུ་སྲོལ་འདུག སྔར་བོད་མིའི་ཁུལ་དེ་ལྟར་ཡིན་ས་རེད།

ཡང་ཚོང་ཁང་དུ་བསྐྱོད་ན་རྒྱ་གར་བའི་ཚོང་ཁང་ཡིན་ན་ཚོང་པས་ཕལ་ཆེར་ “ཀྱ་ ཅ་ཡི་ ཡེ་” འདྲི་ཡི་རེད་བསམ། དེའི་དོན་ནི་”ག་རེ་དགོས་ཡོད་དམ་”ཟེར་བ་ཡིན། ཨ་མེ་རི་ཀའི་ཚོང་ཁང་ཞིག་ནང་ཚོང་པས་ “མེ་ ཨཡེ་ ཧེལེབ་ ཡུ་” “ངས་ཁྱེད་ལ་རོགས་པ་བྱེད་དགོས་སམ་”འདྲི་བ་རེད།

བོད་མིས་རང་ལུས་མཆོད་མེ་ཕུལ་དགོས་པའི་རྒྱུ་མཚན་ལྟེ་བ་གཅིག་དང་དོན་ཆེན་གཉིས་ཡིན།

ཟླ་༡ཚེས་༢༠ ཉིན་གུས་པས་ཨ་རིའི་ཝི་ཨོ་ཨེ་བོད་སྐད་ཀྱི་ཀུན་གླེང་བརྙན་འཕྲིན་ལས་རིམ་ཐོག་བར་སྐབས་བོད་ནང་གི་གནས་ཚུལ་ཐོག་གླེང་མོལ་ཞུ་ཆེད་བཅར་བ་ཡིན །
གུས་པས་བོད་ནང་བོད་མི་ཚོས་རང་ལུས་མེར་བསྲེགས་གནང་དགོས་པའི་པའི་རྒྱུ་མཚན་”ལྟེ་བ་གཅིག་དང་དོན་ཆེན་གཉིས་”ཡོད་རེད་ཞུས་པ་ཡིན།
ལྟེ་བ་གཅིག་ནི་འདས་པའི་ལོ་༦༠ལྷག་རིང་རྒྱ་ནག་ནས་བོད་ས་ཁུལ་ཐོག་དབང་སྒྱུར་བྱས་པ་དང་། དེའི་རིང་གི་སྲིད་བྱུས་ལག་བསྟར་བྱས་པ་དེ་རེད། རྒྱ་ནག་གཞུང་ནས་དབང་སྒྱུར་དེ་ནི་བཅིངས་འགྲོལ་ཡིན་གསུངས་ཀྱི་ཡོད་རུང་དོན་དངོས་ཐོག་བོད་མིར་སྔར་ཡོད་རང་དབང་དེའང་མེད་དུ་འགྱུར་བས་དེ་ནི་བཅིངས་འགྲོལ་དང་མ་མཐུན་པ་ཞིག་ཆགས་ཡོད།
དོན་ཆེན་གཉིས་ཡོད་པ་ནི་དེ་མ་ཐག་པའི་རྒྱུ་མཚན་རེད་ཞུ་ན་སྒྲིག་གང་ཡིན་ཞུ་ན་དེ་རྣམས་ཉེ་བའི་ལོ་འགའ་ཞིག་ནང་དངོས་གསལ་ནས་བྱུང་བ་དེ་ཡིན། དེའི་དོན་ཆེན་དང་པོ་ནི་༢༠༠༨ལོར་བོད་ཡོངས་ཀྱི་མངས་ཚོགས་ནས་སྒེར་ལངས་གནང་བ་དེར་རྒྱ་ནག་གཞུང་ནས་ཡ་ལན་དྲག་པོའི་ཐོག་ནས་གནང་བ་མ་ཟད། བོད་མི་དང་རྒྱ་མི་རིགས་དབར་འགལ་ཟླ་བཟོ་བའི་སྲིད་བྱུས་ལག་ལེན་བསྟར་བ་དེ་ཡིན། བོད་མིའི་སེམས་ནང་རང་ཉིད་ཀྱི་བདེ་སྡུག་ལ་རྒྱ་ནག་གཞུང་ནས་གསན་ཤེས་གནང་གི་མེད་པའི་ཚོར་བ་དེ་ཤུགས་ཆེ་རུ་ཕྱིན་པ་རེད།
དོན་ཆེན་གཉིས་པ་དེ་ནི་བོད་མིར་རང་གི་ཆོས་དང་། རིག་གཞུང་། ཉིན་རེའི་བྱེད་སྒོ་ལ་སོགས་པའང་ལོངས་སུ་སྤྱོད་རྒྱུའི་གོ་སྐབས་ཉིན་རེ་ནས་ཉིན་རེ་ཉུང་དུ་ཕྱིན་ནས་ད་ཆ་མེད་པ་ལྟ་བུ་ཆགས་པའི་ཁོར་ཡུག་དེ་རེད། དེ་རྐྱེན་རྒྱ་ནག་གཞུང་གིས་བོད་མིའི་བྱ་སྤྱོད་ཐ་དག་”ཆབ་སྲིད་”ཡིན་པར་ངོས་འཛིན་བྱས་པའི་ཁོར་ཡུག་འོག་བོད་མིར་བདེ་སྡུག་ཞུ་ས་ཕར་བཞག་དེ་ཐོག་གླེང་མོལ་གནང་རྒྱུའི་གོ་སྐབས་གང་ཡང་མེད་པ་ཆགས་པ་རེད།
བོད་ནང་བོད་མི་ཚོའི་ལུས་ཀྱི་མཆོད་མེ་དེ་ཚོའི་བརྡ་ལན་ག་རེ་ཡོད་དམ་ཞུ་ན་གུས་པའི་བསམ་པར་བརྡ་ལན་ཁག་གསུམ་ཙམ་ཡོད་རེད་བསམ།
བརྡ་ལན་དང་པོ་དེ་ནི་བོད་པའི་ལས་འགུལ་དེ་ད་ཆ་མི་རབས་གསར་པས་འགོ་ཁྲིད་གནང་གི་ཡོད་པ་དེ་གསལ་པོ་ཆགས་པ་རེད། སྐུ་ལུས་མཆོད་མི་འབུལ་གནང་མཁན་རྣམས་༡༩༦༤རྗེས་འཁྲུངས་པ་དང་། ཁོང་རྣམས་རྒྱ་ནག་དམར་པོའི་སྤྱི་ཚོགས་འོག་ཚར་ལོང་བྱུང་བ་ཤ་སྟག་རེད། དེས་ད་ཡོད་རྒྱ་ནག་གི་བོད་མིའི་ཐོག་སྲིད་བྱུས་དེའི་ཕན་ཡོན་གང་འདྲ་བྱུང་ཡོད་པ་དེ་མཚོན།

བརྡ་ལན་གཉིས་པ་ནི་བྱུང་རིམ་འདིས་བོད་ནང་གི་དངོས་ཡོད་གསར་པ་དེ་སྟོན་པ་རེད་། བོད་ནང་བོད་མི་ཚོར་འཛམ་གླིང་གི་གནས་ཚུལ་ཆ་ཚང་མཁྱེན་ཐུབ་རྒྱུ་མེད་རུང་རྒྱ་ནག་ནང་གི་སྤྱི་ཚོཌ་སྐོར་མཁྱེན་གྱི་ཡོད་སྟབས་བོད་མི་ཚོར་མི་རིགས་དབྱེ་འབྱེད་ཀྱི་སྲིད་བྱུས་ལག་བསྟར་བྱེད་བཞིན་པ་དེ་ཉིན་ལྟར་ཚོར་གྱི་ཡོད་པ་རེད།
བརྡ་ལན་གསུམ་པ་དེ་ནི་རྒྱ་ནག་གཞུང་ནས་བོད་ཐོག་རང་ཉིད་ནས་བདེན་པ་མིན་པའི་དྲིལ་བསྒྲགས་དེར་མགོ་འཁོར་བ་སྟོན་པ་དེ་རེད། འདི་ཐོག་རྒྱ་ནག་དབུས་དང་ས་གནས་ཁག་ཏུ་ཡོད་པའི་བོད་རིགས་ལས་བྱེད་ཚོས་ཀྱང་བདེན་པ་མིན་པའི་སྙན་ཞུ་ཕུལ་བའི་རྐྱེན་གྱི་གནས་སྟངས་དེ་འདྲ་ཆགས་པ་རེད་བསམ།

གང་ལྟར་བོད་ནང་བྱུང་བའི་གནས་ཚུལ་དེས་རྒྱ་ནག་གཞུང་། རྒྱལ་སྤྱིའི་གཞུང་དང་མི་མང་རྣམས་ཀྱི་བློ་ཡུལ་ལ་མེད་པ་ཞིག་ཡིན་ཞིང་། དེར་བརྟེན་འཛམ་གླིང་གི་གཞུང་ཁག་ནས་བྱུང་རིམ་འདི་དང་འབྲེལ་བའི་ཐོག་དགོངས་པ་བཞེས་ཕྱོགས་ཐོག་བཀའ་བསྡུར་གནང་བཞིན་རེད། དེ་བཞིན་རྒྱ་ནག་གཞུང་གི་འབྲེལ་ཡོད་ལས་བྱེད་ནས་དོན་གནད་འདི་ཐོག་བཀའ་བསྡུར་ལྷུག་པོ་གནང་གི་ཡོད་པ་ནི་བརྗོད་མི་དགོས་པ་རེད། གུས་པའི་རེ་བར་རྒྱ་ནག་གཞུང་ནས་དཀའ་རྙོག་སེལ་ཆེད་དྲག་པོའི་ཐབས་ལམ་ཞིག་བསྐྱར་དུ་བེད་སྤྱོད་མི་གནང་བ་དེ་ཡིན།
སེམས་ཤུགས་བསྐྱེད་དགོས་པ་ཞིག་ལ་རྒྱ་ནག་ནང་ཨ་ནི་ཞིག་དང་། མཁས་དབང་ཝང་ལི་ཤོང་སོགས་ནས་བོད་མིས་རང་ལུས་མཆོད་མེ་ཕུལ་བའི་སྐོར་རྩོམ་བྲིས་གནང་བ་དང་། དེ་བཞིན་རྒྱ་སྐད་དྲ་ཚིགས་སོགས་ནང་གནད་དོན་དེར་གྲོས་བསྡུར་ལྷུག་པོ་ཡོང་བཞིན་པ་དེ་ཡིན། དེས་རྒྱ་ནག་སྤྱི་ཚོགས་ནང་བོད་དོན་ཐོག་བགྲོ་གླེང་ལེགས་པའི་རང་བཞིན་དུ་འགྲོ་རྒྱུར་ཕན་ཐོག་ཡོད།

རྒྱ་རིཌ་ཞིག་གི་དེབ་ཀྱིས་ཨ་རིའི་ནང་ཕྲུ་གུ་གསོ་སྐྱོང་བྱེད་སྟངས་ཐོག་བགྲོ་གླེང་།


བར་སྐབས་ཨ་མེ་རི་ཀའི་སྤྱི་ཚོགས་ནང་དངོས་གསལ་དོད་པོ་མིན་པའི་ཐོག་ནས་བགྲོ་གླེང་ཡོང་བཞིན་པ་ཞིག་ནི་ཡེལ་སློབ་གྲ་ཆེན་མོའི་དགེ་རྒན་ཨེ་མི་ཆུ་ཨ་ཞུ་བའི་དེབ་ “སྟག་གི་ཨ་མའི་དམག་གི་གླུ་དབྱངས།” དེ་སྐོར་རེད། སྐུ་ཞབས་ཨེ་མི་ལགས་ནི་རྒྱ་རིགས་ཞིག་ཡིན་པ་དང་དེབ་དེའི་ནང་ཁོང་ནས་རང་ཉིད་ཀྱི་ཕྲུ་གུ་གཉིས་གསོ་སྐྱོང་བྱེད་སྟངས་”རྒྱ་མིའི་ལུགས་སྲོལ་”བཞིན་སྒྲིག་དམ་པོའི་ཐོག་ནས་བྱས་ཡོད་པ་དང་། དེས་ད་ཆ་བུ་མོ་གཉིས་གང་སྤྱིའི་ཐོག་ནས་མདུན་གྲལ་དུ་ཚུད་པ་དེ་བཤད་ཡོད། ཁོང་ནས་ཕྲུ་གུ་གཉིས་ཉིན་ལྟར་ཆུ་ཚོད་མང་པོར་ཨང་རྩིས་དང་། དག་ཆ། དེ་བཞིན་རོལ་དབྱངས་སོགས་སྦྱོང་བརྡར་བྱེད་བཅུག་ཡོད་འདུག འོན་ཀྱང་གསོ་སྐྱོང་དེ་འདྲ་གནང་བཞིན་སྐབས་ཕྲུ་གུ་གཉིས་གུ་ཡངས་པོ་བྱུང་མེད་པ་དང་། ཁོང་གཉིས་ནས་འདོད་དམ་མ་འདོད་རུང་རོལ་དབྱངས་སོགས་སློབ་སྦྱོང་བྱེད་བཅུག་པ་དེ་ནི་ཨ་མེ་རི་ཀའི་སྤྱི་ཚོགས་ནང་ཕྲུ་གུ་འཚར་ལོང་བྱེད་སྟངས་དང་མ་མཐུན་པ་རེད། དེར་བརྟེན་ཁོང་ལ་ཨ་རིའི་མི་མང་ངོས་ནས་སྐྱོན་བརྗོད་ཡང་ཤུགས་ཆེན་པོ་བྱུང་ཡོད་འདུག འགའ་ཞིག་ནས་སྐུ་ཞབས་ཨེ་མི་ནི་”སྲིན་པོ་རེད་”ཟེར་བ་དང་། ཡང་འགའ་ཞིག་ནས་”ཁོང་ནས་རང་གི་ཕྲུ་གུ་གསོ་སྐྱོང་བྱེད་སྟངས་དེ་ཚད་ལས་བརྒལ་བ་ཞིག་རེད།”གསུངས་བཞིན་རེད།
གང་ལྟར་ཁོང་གི་དེབ་དེ་ནི་མང་པོ་ཞིག་གིས་ཉོ་མངགས་གནང་བཞིན་པ་དང་གསར་འགོད་པ་ཞིག་ནས་དེབ་དེས་རྒྱ་མེ་རི་ཀའི་ནང་ཕ་མ་ཚོ་བསམ་བློ་བཏང་དགོས་རྒྱུ་བཟོས་འདུག་ཟེར།
སྐུ་ཞབས་ཨེ་མི་ཡི་ཕྲུ་གུ་གསོ་སྐྱོང་བྱེད་སྟངས་དེ་ང་ཚོ་བོད་མི་ཚོའི་བྱེད་སྟངས་འདྲ་པོ་མི་འདུག་གམ།

སྲིད་འཛིན་ཨོ་སྦ་མས་བོད་སྐོར་རྒྱ་ནག་སྲིད་འཛིན་ཧུ་ཅིན་ཐའོ་མདུན་གསུངས་པའི་གོ་དོན་ག་རེ་ཡིན་ནམ།

པར་དབང་། ཕོ་བྲང་དཀར་པོ། Pete Souza

ཨ་མེ་རི་ཀའི་སྲིད་འཛིན་སྦ་རག་ཨོ་སྦ་མས་ཟླ་༡་ཚེས་༡༩ཉིན་ཕོ་བྲང་དཀར་པོའི་ནང་རྒྱ་ནག་སྲིད་འཛིན་ཧུ་ཅིན་ཐའོ་ལྷན་གསར་འགོད་ལྷན་ཚོཌ་སྐབས་བོད་སྐོར་འདི་ལྟར་གསུངས་ཡོད།

“ཨ་མི་རི་ཀས་བོད་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་ཡིན་པར་ངོས་འཛིན་བྱེད་བཞིན་མཉམ་བོད་མིའི་ཆོས་དང་རིག་གཞུང་གི་ངོ་བོ་གཅེས་སྲུང་འཚུད་པའི་ཕྱོགས་གཉིས་དབར་བསམ་ཚུལ་མི་མཐུན་པ་དང་སེམས་ཚབ་བྱ་རྒྱུའི་གནད་དོན་རྣམས་སེལ་སླད་ཏཱ་ལའི་བླ་མའི་སྐུ་ཚབ་དང་ལྷན་གྲོས་མོལ་རྒྱུན་མཐུད་ཡོང་རྒྱུར་ཨ་མེ་རི་ཀས་མུ་མཐུད་ནས་རྒྱབ་སྐྱོར་ཞུ་རྒྱུ་ཡིན།”

སྲིད་འཛིན་ཨོ་སྦ་མས་བོད་སྐོར་འགྲེལ་བརྗོད་གནང་བ་དེར་གོ་དོན་གཉིས་དང་ཆབ་སྲིད་སྔོན་བརྡ་གཅིག་ཡོད་པ་གུས་པའི་ཚོར་སྣང་ཡིན།
གོ་དོན་དང་པོ་དེ་ནི་རྒྱ་ནག་སྲིད་འཛིན་དང་གཞུང་ལ་བོད་ཀྱི་དཀའ་རྙོག་སྐོར་༧རྒྱལ་བ་རིན་པོ་ཆེའི་སྐུ་ཚབ་ལྷན་གྲོས་མོལ་བརྒྱུད་སེལ་དགོས་པའི་ཨ་མེ་རི་ཀའི་སྲིད་བྱུས་དེ་བསྐྱར་ནན་གནང་བ་དང་ཆབ་གཅིག་གྲོས་མོལ་རྒྱུན་མཐུད་བྱེད་དགོས་པའི་གོ་དོན་ཡིན། ༢༠༡༠ཟླ་༡ནང་འབྲེལ་མོལ་ཐེངས་༩གནང་རྗེས་ཕྱོཌ་གཉིས་དབར་ད་བར་འདུ་འཛོམས་བྱུང་མེད།
གོ་དོན་གཉིས་པ་དེ་ནི་སྲིད་འཛིན་ཨོ་སྦ་མས་བོད་སྐོར་འགྲེལ་བརྗོད་གནང་སྐབས་ཀྱི་ཁོར་ཡུག་དང་ངོ་བོ་དེ་དང་འབྲེལ་བ་ཡོད། ཡོངས་བསྒྲགས་གསར་འགོད་ལྷན་ཚོགས་ཞིག་གི་སར་དང་རྒྱ་ནག་སྲིད་འཛིན་གྱི་མདུན་གནང་བ་དེས་བོད་ཀྱི་གནད་དོན་དེ་ནི་སྲིད་འཛིན་ཨོ་སྦ་མ་དང་ཁོང་གི་སྲིད་གཞུང་ནས་ཨ་རི་དང་རྒྱ་ནག་གི་འབྲེལ་བའི་ཐོག་གལ་གནད་ཆེ་བ་ཞིག་རྩིས་གནང་གི་ཡོད་པ་སྟོན་ཆེད་ཡིན།

ཆབ་སྲིད་ཀྱི་སྔོན་བརྡ་གཅིག་དེ་ནི་བར་སྐབས་ནས་རྒྱ་ནག་གཞུང་ནས་བོད་དེ་རྒྱ་ནག་གི་གཞི་རྩའི་ཁེ་ཕན་ཡིན་པས་རྒྱལ་ཁབ་གཞན་ནས་དེ་ཐོག་རྒྱབ་སྐྱོར་ཕར་བཞག་འགྲེལ་བརྗོད་ཙམ་ཡང་བྱེད་ན་སྒྲིག་གི་མེད་ཟེར་བ་དེར་བརྡ་ལན་གསལ་པོ་རེད། སྲིད་འཛིན་ཨོ་སྦ་མས་བོད་སྐོར་རྒྱ་ནག་གི་གཞི་རྩའི་ཁེ་ཕན་གྱི་འགྲེལ་བརྗོད་དེར་ངོས་ལན་མ་གནང་བ་དང་བོད་ཀྱི་གནད་དོན་དེ་ཨ་མེ་རི་ཀའི་མི་མང་གི་འདོད་དོན་དང་འབྲེལ་བ་བཟོས་སོང་བསམ།
གང་ལྟར་སྲིད་འཛིན་ཨོ་སྦ་མས་བོད་སྐོར་བཀའ་མོལ་གནང་བ་དེ་ནི་ལེགས་པའི་རང་བཞིན་ཡིན་པ་དང་མ་འོངས་པར་དེ་ཐོག་གནས་སྟངས་གང་འདྲ་ཆགས་མིན་བལྟ་རྒྱུ་རེད།

༢༠༡༠ ལོའི་ནང་བོད་དང་འབྲེལ་བའི་གནས་ཚུལ་ཆེ་ཁག་ཐོག་གུས་པའི་དཔྱད་ཞིབ།

ཕྱི་ལོ་གསར་པ་འདིར་གུས་པའི་ཟིན་བྲིས་འདིར་ཕེབས་མཁན་ཚང་མར་འཚམས་འདྲི་ཞུ་རྒྱུ་དང་། ལོ་འདིར་སྐུ་ཉིད་ཀྱི་ལས་དོན་ཐམས་ཅད་དོན་སྙིང་ལྡན་པ་ཡོང་བའི་སྨོན་ལམ་ཡོད།
འདས་མ་ཐག་པའི་ལོའི་ནང་བོད་དང་འབྲེལ་བའི་གནས་ཚུལ་བྱུང་བ་དབྱེ་བ་གཉིས་སུ་ཕྱེ་ཆོག་འདུག གཅིག་ནི་ཆབ་སྲིད་དང་འབྲེལ་བའི་གནས་ཚུལ་དང་གཉིས་པ་དེ་ནི་སྤྱི་ཚོགས་དང་འབྲེལ་བའི་གནས་ཚུལ་ཡིན།

ཆབ་སྲིད་དང་འབྲེལ་བའི་གནས་ཚུལ་ལ་ཞིག་ན་གཤམ་འཁོད་རྣམས་༢༠༡༠ ལོའི་གལ་ཆེ་བའི་དོན་ཚན་ཡིན།

༡༽ཕྱི་ཟླ་དང་པོའི་ནང་༧གོང་ས་མཆོག་གི་སྐུ་ཚབ་དང་རྒྱ་ནག་གཞུང་གི་སྐུ་ཚབ་ལྷན་འབྲེལ་མོལ་ཐེངས་དགུ་པ་དེ་གནང་སྐབས་བོད་མིའི་ངོས་ནས་དེ་སྔའི་”བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་” དེ་ཐོག་འགྲེལ་བཤད་ཀྱི་ཡིག་ཆ་རྒྱ་ནག་སྐུ་ཚབ་ལ་གནང་ཡོད་པ་རེད། ཡིག་ཆ་དེས་བོད་ཀྱི་མ་འོངས་པའི་ཐོག་༧གོང་ས་མཆོག་གི་དགོངས་པ་བཞེས་ཕྱོགས་དེ་གསལ་དུ་བཟོ་ཡོད་པ་རེད།

༢༽ ཕྱི་ཟླ་གཉིས་པའི་ནང་༧གོང་ས་མཆོག་ཨ་མེ་རི་ཀའི་རྒྱལ་ས་ཝ་ཤིང་ཊོན་དུ་ཆིབས་བསྒྱུར་གནང་ནས་སྲིད་འཛིན་ཨོ་སྦ་མ་མཇལ་གནང་བ་དང་། དེ་རྗེས་ཕོ་བྲང་དཀར་པོ་ནས་ཡོང་ཁྱབ་གསལ་བསྒྲགས་ཞིག་ནང་༧གོང་ས་མཆོག་གི་ལམ་དབུ་མར་སྲིད་འཛིན་ཨོ་སྦ་མས་རྒྱབ་སྐྱོར་གནང་གི་ཡོད་པ་གསུངས་ཡོད། དེ་ནི་ཨ་རིའི་སྲིད་འཛིན་ཞིག་གི་ངོས་ནས་དབུ་མའི་ལམ་ལ་ཡིག་ཐོག་ནས་རྒྱབ་སྐྱོར་གསལ་པོ་གསུངས་པ་དང་པོ་ཡིན།

༣༽ཟླ་བ་ལྔ་པ་དང་བརྒྱད་པའི་ནང་༧གོང་ས་མཆོག་ནས་དྲ་རྒྱའི་འཕྲུལ་སྒྲ་བརྒྱུད་རྒྱ་རིགས་ཚོའི་དྲི་བར་བཀའ་ལན་གནང་བ་དེས་མགོན་པོ་གང་ཉིད་དང་རྒྱ་རིགས་མང་ཚོགས་དབར་ཐད་ཀའི་འབྲེལ་བ་མཚོན་པ་དང་དེས་རྒྱ་རིགས་དང་རྒྱལ་སྤྱིའི་ནང་བག་ཆགས་དམིགས་བསལ་ཞིག་བྱུང་ཡོད།

Continue reading “༢༠༡༠ ལོའི་ནང་བོད་དང་འབྲེལ་བའི་གནས་ཚུལ་ཆེ་ཁག་ཐོག་གུས་པའི་དཔྱད་ཞིབ།”

འཕྲུལ་ཆས་རིགས་ཀྱི་གད་སྙིགས་ལ་ལྟ་སྟངས་འཛིན་དགོས།

གློག་ཀླད་གད་སྙིགས་ཀྱི་དཔེ་མཚོན།

ད་ཉིན་ཞོགས་པ་བརྙན་འཕྲིན་ཐོག་རྒྱ་གར་ནང་འཕྲུལ་ཆའི་རིགས་ཀྱི་གད་སྙིགས་སྐོར་ཆེད་སྒྲིག་ལེ་ཚན་ཞིག་མཐོང་བྱུང་བས་དེས་བསམ་བློ་གཏོང་དགོས་པ་བཟོ་བྱུང་། རྒྱ་གར་ནང་གློག་ཀླད་ཀམ་པུ་ཊར་དང་ལག་འཁྱེར་ཁ་པར་སོགས་བེད་སྤྱོད་བྱེད་རྒྱུ་མང་དུ་ཕྱིན་པའི་རྐྱེན་དེ་ཚོའི་གད་སྙིགས་ཡང་མང་དུ་ཕྱིན་ཡོད་པ་རེད་། འོན་ཀྱང་གད་སྙིགས་འདི་རིགས་རང་བཞིན་གྱི་མེད་པ་ཆགས་ཀྱི་མེད་པའི་སྟེང་ཁོར་ཡུག་དང་སེམས་ཅན་རྣམས་ཀྱི་འཕྲོད་བསྟེན་ལའང་སྐྱོན་བཟོ་ཡི་ཡོད་པ་རེད་། ཡར་འཐོན་རྒྱལ་ཁབ་ཁག་ཡིན་ན་གད་སྙིགས་འདི་རིགས་ལ་བལྟ་ཕྱོགས་མ་འདྲ་བ་ཡོད་པས་གང་བྱུང་གཡུག་པའམ་སུ་ཡིན་ནས་འདི་རིགས་ལ་གང་བྱུང་བེད་སྤྱོད་བྱེད་ཆོགས་ཀྱི་མེད་པ་རེད་། དཔེར་ན་ཚགས་པར་སོགས་ཤོག་བུའི་རིགས་ཡིནའང་དེ་ཚོར་གད་སྙིགས་ངོ་བོ་ཐ་དད་ཞིག་ཡིན་པར་ངོས་འཛིན་པ་རེད་། སུད་སི་རྒྱལ་ཁབ་ལྟ་བུར་ཁ་ལག་ལྷག་མ་ཡིན་རུང་གད་སྙིགས་གནོད་ནང་མ་གཡུག་གོང་དབྱེ་བ་འགའ་ཞིག་འབྱེད་དགོས་ཡོད་པ་གུས་ནས་དྲན་གསོ་ཡི་འདུག འོན་ཀྱང་རྒྱ་གར་ནང་འཕྲུལ་ཆའི་གད་སྙིགས་འདི་རིགས་ནི་ཟུར་གྱི་ཚོང་མི་ཆུང་བ་ཞིག་ཆགས་ཡོད་བཞིན་མང་ཚོགས་ཀྱི་གོ་རྟོགས་དང་། སྤྱི་ཚོགས་ཀྱི་འཚོ་བའི་གནས་སྟངས། དེ་བཞིན་དངོས་ཡོད་གནས་ཚུལ་གཞན་རྐྱེན་ཚོང་དེ་རིགས་ལ་དམངས་གཞིའི་ཐོག་ནས་མཉམ་ཞུགས་གནང་མཁན་གྱི་མི་མང་དཀྱུད་མ་ཡིན་། ཁོར་ཡུག་གི་གྱོང་ཚང་མར་ཡིན་རུང་འཕྲོད་བསྟེན་གྱི་གྱོང་གང་ཟག་དེ་རིགས་ལ་རག་བཞིན་པ་རེད་། གནས་ཚུལ་འཐོན་པ་ལྟར་ན་རྒྱ་གར་གཞུང་ནས་གནས་སྟངས་དེའི་སྐྱོན་གཟིགས་ནས་འཕྲུལ་ཆའི་གད་སྙིགས་ཀྱི་སྲིད་བྱུས་ཞིག་གཏན་འབེབས་གནང་བཞིན་རེད་འདུག དེ་ནི་བཟང་ཕྱོགས་ཀྱི་གོམ་པ་ཞིག་ཡིན་། བོད་མིའི་སྤྱི་ཚོགས་ཡིནའང་གནས་ཚུལ་འདིར་དགོངས་པ་བཞེས་དགོས་ཡོད་། བོད་ཕྱི་ནང་གཉིས་སུ་གློག་ཀླད་དང་ལག་འཁྱེར་ཁ་པར་སོགས་བེད་སྤྱོད་གནང་མི་ཉིན་རེ་བཞིན་མང་དུ་འགྲོ་བཞིན་རེད་། འཕྲུལ་ཆའི་ཡར་རྒྱས་འགྲོ་སྟངས་ལ་ཞིག་ན་དེ་རིགས་ཀྱི་གད་སྙིགས་ཡང་ཉིན་རེ་བཞིན་མང་དུ་འགྲོ་རྒྱུ་དེ་ཟུར་བལྟས་ལེབ་གསལ་ཡིན་པ་རེད་། བོད་ས་ཁུལ་ཁག་ལ་མཚོན་ན་རྒྱ་ནག་གཞུང་ནས་གད་སྙིགས་དེ་རིགས་ལ་སྲིད་བྱུས་གང་འདྲ་ཡོད་མིན་ཞུ་རྒྱུ་མེད་། བོད་ནང་བཞུགས་མཁན་ཚོས་དེ་ཐོག་དགོངས་པ་བཞེས་དགོས་ཡོད་། བཙན་བྱོལ་བོད་མིའི་སྤྱི་ཚོགས་ལ་མཚོན་ན་བོད་གཞུང་གི་ལས་ཁུངས་ཁག་ཏུ་༡༩༩༠གཡས་གཡོན་ལ་གློག་ཀླད་རེ་ཟུང་ལས་མེད་པའི་དུས་ནས་ད་ལྟ་ལས་ཁུངས་གཅིག་གི་ནང་དེ་རིགས་བཅུ་གྲངས་ཡོད་པའི་དུས་ཡིན། དེ་བཞིན་ལག་འཁྱེར་ཁ་པར་ནི་དེ་ལས་མང་བ་ཡོད་པས་གལ་ཏེ་བོད་གཞུང་ནས་འཕྲུལ་ཆའི་གད་སྙིགས་ཐོག་དགོངས་པ་བཞེས་མེད་པ་ཡིན་ན་དེ་འདྲ་གནང་རྒྱུ་དུས་ལ་བབས་ཡོད་།

ཨ་རིའི་རྒྱལ་ས་ཝ་ཤིང་ཊོན་ཁུལ་དུ་ཨེ་ཤེ་ཡའི་མི་རིགས་ཚོ་འཛོམས་ས།

བྱང་ཝར་ཇི་ནི་ཡར་ཡོད་པའི་ཀོ་རི་ཡའི་ཚོང་ཁང་ཞིག hmart.com

ཨ་རིའི་༢༠༠༠ ལོའི་མི་འབོར་བསྡོམས་རྩིས་ནང་ཡུལ་འདིའི་ཨེ་ཤེ་ཡའི་མི་རིགས་ཀྱི་གྲངས་འབོར་ནི་ས་ཡ་༡༢ ཙམ་དང་། དེ་ནི་ཨ་རི་ཡོངས་ཀྱི་མི་འབོར་གྱི་བརྒྱ་ཆ་༤་༣ཙམ་ཡིན་འུདག རྒྱལ་ས་ཝ་ཤིང་ཊོན་མངའ་ཁུལ་དུ་ཡོད་པའི་ཨེ་ཤེ་ཡའི་མི་རིགས་ཀྱི་མི་འབོར་ནི་༢༠༠༠ ལོའི་བསྡོམས་རྩིས་ནང་འབུམ་བཞི་མ་ཟིན་ཙམ་རེད་འདུག
རིང་མིན་༢༠༡༠ ལོའི་མི་འབོར་བརྡོམས་རྩིས་ནང་མི་འབོར་དེ་ལས་མང་བ་ཡོད་པ་གསལ་རྒྱུ་ནི་བརྗོད་མི་དགོས་པ་རེད་། དཔེར་ན་ང་རང་བསྡོད་སའི་ས་ཁུལ་དུ་དེང་རྒྱ་གར་ནས་ཡིན་པའི་གློག་ཀླད་ཐོག་མཁས་དབང་ཕེབས་མི་མང་དུ་ཕྱིན་ཡོད་པ་མཐོང་གི་འདུག
གུས་པའི་ཚོར་བ་གཞན་ཞིག་ནི་འདི་ཁུལ་གྱི་ཨེ་ཤེ་ཡའི་མི་རིགས་ཡིན་པ་ཕལ་མོ་ཆེས་ཉིན་རེའི་ཟ་ཆས་ཉོ་ས་གཙོ་བོ་ཞིག་ནི་”ཀོ་རི་ཡའི”ཚོང་ཁང་ཟེར་བ་དེ་ཚོ་རེད་། བྱང་ཝར་ཇི་ནི་ཡའི་མངའ་སྡེའི་ནང་དེ་འདྲ་བའི་ཀོ་རི་ཡའི་ཚོང་ཁང་ཆེ་བ་གཉིས་ཡོད་པ་དང་། དེ་བཞིན་རྒྱ་མིའི་ཚོང་ཁང་ཆེ་བ་གཅིག་ཡོད་། ཚོང་ཁང་དེ་ཚོར་ག་དུས་ཕྱིན་ཀྱང་སྒོ་ནང་འཛུལ་མ་ཐག་ཀོ་རི་ཡ། རྒྱ་གར་བ། བོད་མི་སོགས་མ་གཏོགས་མི་རིགས་དཀར་པོ་དང་ནག་པོ་རེ་ཟུང་ལས་མཐོང་རྒྱུ་མེད་། ཚོང་ཁང་དེ་ཚོའི་ནང་སླེབས་སྐབས་བསམ་བློའི་ནང་ཡོད་པའི་ཨ་རིའི་སྤྱི་ཚོགས་མིན་པར་ལུང་པ་གཞན་ཞིག་ལ་སླེབས་པའི་ཚོར་བ་ཡང་ཤར་གྱི་འདུག ཁྱད་ཚར་བ་ཞིག་ལ་ཨེ་ཤེ་ཡའི་མི་རིགས་ཚོས་ཚོང་ཁང་དེ་ཚོ་རང་གི་འཛོམས་ས་ལྟ་བུ་བཟོ་གནང་བ་དེ་ནི་ཚོང་ཁང་ཚོའི་ངོས་ནས་ཁྱབ་བསྒྲགས་གནང་བའི་རྐྱེན་མིན་པར་མི་ཕན་ཚུན་གྱི་གཅིག་གི་གཅིག་ལ་ངོ་སྤྲོད་བྱུང་བ་མང་བ་རེད་།
དེ་འདྲ་སོང་ཌི་སི་ཁུལ་ནས་མིན་པའི་བོད་མི་ཞིག་ནས་འདི་ཁུལ་དུ་ཕེབས་ཀྱི་ཡོད་པ་དང་ངོ་ཤེས་སུ་ཡང་མེད་ན་ཚོང་ཁང་དེ་ཚོའི་ནང་ཕེབས་དང་ཕལ་ཆེར་བོད་པ་གཅིག་མཇལ་རྒྱུ་ཡིན་ཡིན་པ་རེད་།

རྒྱ་གར་ནང་མངའ་སྡེ་གསར་པ་ཞིག་གཙུགས་རྒྱུའི་སྐོར་གླེང་བ།

མཚོན་མདོག་དཀར་པོའི་ནང་ཡོད་པ་དེ་ཏེ་ལན་ག་ན་ཡིན་།

ཉིན་མ་གཉིས་༼ཟླ་༡༢ ཚེས་༩ དགོང་མོར་༽གོང་རྒྱ་གར་ནང་སྲིད་བློན་ཆེན་པི་ཆི་ཏམ་སྦ་རན་ནས་རྒྱ་གར་གྲོས་ཚོགས་ནང་གཏམ་བཤད་ཐུང་ངུ་ཞིག་བརྒྱུད་ད་ཡོད་རྒྱ་གར་ལྷོ་ཕྱོགས་མངའ་སྡེ་ཨན་རྡ་ར་པར་རྡེ་ཤི་དེ་བགོས་ནས་མངའ་སྡེ་གསར་པ་ཏེ་ལན་ག་ན་ཟེར་བ་ཞིག་ཟུར་དུ་བཟོ་རྒྱུ་ཡིན་པ་གསུངས་འདུག དེ་ནི་ཉེ་བའི་འཆར་རྒྱ་གར་དམངས་གཙོའི་འགྲོ་ལུགས་ནང་ལས་རིམ་གསར་པ་ཞིག་རེད་།

ལོ་རྒྱུས་ནང་ཏེ་ལན་ག་ན་ཟེར་བའི་ས་ཁུལ་དེ་ཡོད་དེ་༡༩༤༧ ལོར་རྒྱ་གར་རང་བཙན་ཐོབ་སྐབས་ས་ཁུལ་དེ་གཙོས་ས་ཆ་ཁྱོན་ཆེ་ཧ་ཡེ་རྡ་ར་སྦ་ཐ་ཞེས་པ་དེ་རྒྱལ་བརྒྱུད་ཞིག་གི་དབང་བསྒྱུར་འོག་ཡོད་པས་རྒྱ་གར་གཞུང་ནས་དྲག་པོའི་ཐོག་༡༩༤༩ ཙམ་ལ་རྩིས་ལེན་ཡོད་། དེ་ནས་ད་བར་ས་ཁུལ་དེ་ཨན་རྡ་ར་པར་རྡེ་ཤི་ཁོངས་སུ་ཡོད་།

ཏེ་ལན་ག་ན་ནི་ཏེ་ལི་གུ་སྐད་རྒྱབ་མིའི་ས་ཁུལ་ཞིག་ཡིན་པས་ཁོང་ཚོས་ལོ་མང་རིང་ཆབ་སྲིད་དང་སྤྱི་ཚོགས་ཀྱི་ཐོབ་ཐང་འདྲ་མཉམ་རག་གི་མེད་པའི་རྐྱེན་ལས་འགུལ་ཡང་མང་པོ་སྤེལ་ཡོད་། ཉེ་བའི་འཆར་ཁོང་ཚོའི་འགོ་ཁྲིད་ཞིག་ནས་བཟས་བཅད་ངོ་རྒོལ་གནང་ནས་བཞུགས་པ་རེད་།
རྒྱ་གར་དབུས་གཞུང་ནས་ད་བར་མངའ་སྡེ་གསར་པ་དེ་འདྲ་འཛུགས་འདོད་མེད་པ་ནི་སྐད་རྒྱབ་སྲོལ་ལ་བརྟེན་ནས་ས་ཆ་བགོ་འདོད་མེད་པའི་རྐྱེན་ཡིན་བརྗོད་ཀྱི་ཡོད་རེད་།

ད་ཆ་རྒྱ་གར་དབུས་གཞུང་གི་གསལ་བསྒྲགས་འདི་རྗེས་མངའ་སྡེ་གསར་པ་དེ་མ་ཆགས་གོང་ཆབ་སྲིད་ཀྱི་ལས་དོན་འགའ་ཞིག་སྤེལ་དགོས་ཀྱི་ཡོད་རེད་།

མཁས་དབང་འགའ་ཞིག་ནས་ཏེ་ལན་ག་ནའི་ལས་འགུལ་དེ་ནི་མི་རིགས་ཀྱི་ངོ་བོ་ཐ་དད་ཡིན་པ་ལས་རིག་གཞུང་དང་ས་ཁུལ་དེའི་དཔལ་འབྱོར་གནས་སྟངས་ཐོག་འདོད་པ་མ་ཁེངས་པའི་རྐྱེན་རེད་བརྗོད་འདུག

གློག་གི་ཤེལ་རྡོག་གཅིག་བརྗེས་པ་ལ་བོད་མི་ག་ཚོད་དགོས་ཡོད་དམ།

རྒྱལ་སྤྱིའི་ནང་དགོད་བྲོའི་སྒྲུང་རྣ་མང་ཡོད་པ་ནས་ང་རང་གི་དགའ་ཤོས་རིགས་གཅིག་ནི་གློག་ཤེལ་རྡོག་བརྗེས་ཆེད་མི་ག་ཚོད་དགོས་ཡོད་དམ་ཟེར་བ་དེ་ཡིན། དེའི་ལན་དེ་སྤྱི་ཚོགས་ཀྱི་རིག་གཞུང་ཁོར་ཡུག་དང་མི་རིགས་ལ་སྟུན་ནས་དགོད་ཚར་བོ་བཟོ་རྒྱུ་ཡོད་།  དེའི་ཐོག་དྲ་ཚིགས་འགའ་ཞིག་ཡང་འདུག ཕལ་ཆེར་འཛམ་གླིང་གི་མི་རིགས་ཚང་མའི་སྐོར་བསྟན་ཤིག་འདི་འདྲ་སློང་འདུག དཔེར་ན་རྒྱ་མི་ཐོག་འདི་འདྲ་ཞིག་རེད་།

ཤེལ་རྡོག་བརྗེས་ཆེད་རྒྱ་མི་ག་ཚོད་དགོས་ཡོད་དམ།

དེ་ནི་ཤེས་ཀྱི་མ་རེད་གང་ཡིན་ཟེར་ན་དེའི་ལན་ནི་རྒྱལ་ཁབ་ཀྱི་གསང་བ་རེད་།

ཡང་གཞུང་གི་ལས་བྱེད་པའི་ཐོག་འདི་འདྲ་རེད་།

ཤེལ་རྡོག་བརྗེས་ཆེད་གཞུང་གི་ལས་བྱེད་ག་ཚོད་དགོས་ཡོད་དམ།

ལས་བྱེད་༤༦ དགོས་ཡོད་། གཅིག་གི་བརྗེས་པོ་རྒྱབ་པ་དང་གཞན་༤༥ ནས་དེ་དང་འབྲེལ་བའི་ཆོག་འཆན་ཡིག་ཆ་ཁག་གོ་སྒྲིག་ཞུ་དགོས་ཡོད་།

ང་ཚོ་བོད་མི་ཐོག་ནང་ཆོས་ཆོས་ལུགས་ས་དགེ་བཀའ་རྙིང་གི་ལྟ་བ་དང་འབྲེལ་ནས་བསྟན་ཤིག་འདི་ལྟར་འདུག

གློག་ཤེལ་རྡོག་བརྗེས་པ་ལ་བོད་པ་ནང་པ་ག་ཚོད་དགོས་ཀྱི་ཡོད་དམ།

དགེ་ལུགས་པ་ཡིན་ན་གསུམ་དགོས་ཀྱི་ཡོད་།  གཉིས་ནས་གློག་གི་ངོ་བོའི་ཐོག་རྩོད་པ་རྒྱབ་རྒྱུ་དང་། གསུམ་པ་དེ་ཤེལ་རྡོག་བརྗེས་པོ་རྒྱབ་མཁན།

ས་སྐྱ་པ་ཡིན་ན་གཉིས་དགོས་ཡོད་། གཅིག་ནས་ཤེལ་རྡོག་བརྗེས་རྒྱུའི་ལམ་སྟོན་རྩ་བ་དང་དེའི་འགྲེལ་པ་བྲིས་རྒྱུ་དང་། གཞན་དེ་ཤེལ་རྡོག་བརྗེས་པོ་རྒྱབ་མཁན།

བཀའ་བརྒྱུད་པ་ཡིན་ན་གཅིག་དགོས་ཡོད་། ཡིནའང་ཁོང་ནས་ཤེལ་རྡོག་མ་བརྗེས་གོང་ལོ་འགའ་ཞིག་རིང་བྲག་ཕུག་ནང་སྒོམ་རྒྱབ་ནས་བསྡོད་དགོས་ཡོད་།

རྙིང་མ་པ་ཡིན་ན་གཅིག་དགོས་ཡོད་།  ཡིནའང་ཁོང་ནས་ཐོག་མར་ཤེལ་རྡོག་བརྗེས་རྒྱུའི་ལམ་སྟོན་དཔེ་ཆ་གཏེར་ནས་སྟོན་དགོས་ཡོད་།