རྡ་སའི་ཕོ་ཉ་དང་བོད་མིའི་ཤེས་ཡོན་སྐོར།

རྡ་སའི་ཕོ་ཉ་དང་བོད་མིའི་ཤེས་ཡོན་སྐོར།

 བུ་ཆུང་ཀེ་ཚེ་རིང་།

“དེང་གི་ན་གཞོན་ཚོས་ཁོང་ཚོའ་ཤེས་ཡོན་གནས་ཚད་ཞན་དུ་ཕྱིན་ཡོད་པ་ཁས་ལེན་གནང་གི་ཡོད་དམ།”

༡༩༨༦ལོར་བཞུགས་སྒར་བོད་རིགས་གཞོན་ནུའི་ས་གནས་རྒྱུན་ལས་ནས་ཟླ་རེའི་གསར་འཕྲིན་རྡ་སའི་ཕོ་ཉ་ཟེར་བ་ཞིག་འགྲེམས་སྤེལ་གནང་སྒོ་བཙུགས། དེ་སྐབས་གུས་རང་ཡང་རྒྱུན་ལས་ཁོངས་སུ་ཡོད།

dharamsalaMessenger

གསར་འཕྲིན་དེའི་ནང་གཞོན་ནུའི་གནས་ཚུལ་ཙམ་མ་ཟད་བཙན་བྱོལ་བོད་མིའི་གནས་སྟངས་དང་གཞུང་གི་མཛད་ཕྱོགས་ཐོག་དཔྱད་ཞིབ་བྱས་ཡོད། དཔེར་ན་༡༩༨༦གི་གསར་འཕྲིན་ལོ་༡འདོན་ཐེངས་༥ནང་བཙན་བྱོལ་བོད་མིའི་ཤེས་ཡོན་གནས་ཚུལ་སྐོར་གླེང་བརྗོད་ཞིག་ཡོད། གླེང་བརྗོད་དེའི་ནང་ང་ཚོས་གནས་སྟངས་ཀྱི་འགྲེལ་བརྗོད་འདི་ལྟར་རེད།

“ཕྱི་ལོ་༡༩༧༩བར་བོད་ཀྱི་གཏན་ཉིན་སློབ་གྲ་ཁག་གི་ནང་སློབ་སྦྱོང་བྱེད་བཞིན་པའི་སློབ་ཕྲུག་ཀྱི་ཤེས་ཡོན་གནས་ཚད་གང་ལེགས་ཐོག་དེའི་འགྲུབ་འབྲས་དེང་སྐབས་བོད་མིའི་སྤྱི་ཚོགས་ནང་གང་སྤྱིའི་ཕྱག་འགན་བཞེས་བཞིན་པའི་ན་གཞོན་ཕལ་ཆེ་བ་སྐབས་དེའི་སློབ་ཕྲུག་ཤ་སྟག་ཡིན།  འོན་ཀྱང་༡༩༧༩ཚུན་རང་རེ་བྱེས་འབྱོར་བའི་འཚོ་བའི་གནས་སྟངས་སོགས་གང་སྤྱིའི་ཡར་རྒྱས་འགྲོ་བཞིན་པའི་སྐབས་འདིར་བོད་ཀྱི་གཏན་ཉིན་སློབ་གྲ་ཁག་གི་ནང་སློབ་སྦྱོང་བྱེད་བཞིན་པའི་སློབ་ཕྲུག་ཚོའི་ཤེས་ཡོན་གནས་ཚད་ ཞན་དུ་འགྲོ་མུས་གནས་ཚུལ་འདི་ཡོངས་གྲགས་ཐོག་བོད་མི་བསམ་ཡོད་ཕལ་ཆེ་བར་བློ་ཚབ་སྐྱེ་གཞིར་འགྱུར་ཡོད་པ་དང་།  རང་རེའི་སྤྱི་ཚོགས་ཀྱི་དཀའ་ངལ་གསར་པ་ཞིག་ཀྱང་ཆགས་ཡོད་པ་རེད།  ད་ཆ་བཙན་བྱོལ་དུ་འབྱོར་ནས་མི་ལོ་ཉེར་བདུན་ལྷག་ཙམ་འཁོར་བའི་སྐབས་འདིར་ཕྱོགས་གཅིག་ནས་སློབ་གྲ་ཁག་གི་ནང་སློབ་ཕྲུག་གི་ཤེས་ཡོན་གནས་ཚད་ཞན་དུ་འགྲོ་བ་དང་།  ཕྱོགས་གཞན་ཞིག་ནས་སློབ་ཕྲུག་གང་འཚམས་ཤིག་སློབ་སྦྱོང་མཇུག་འཁྱོངས་མ་བྱས་པར་ཕྱིར་འཐེན་གྱིས་སུད་ཚོང་མི་གླས་ལྟ་བུར་འཁྲིད་ཀྱི་ཡོད་པ་ནི་ཧ་ཅང་བློ་ཕམ་དང་མ་འོངས་པའི་མི་རབས་ཇི་འདྲ་ཞིག་ཏུ་འགྱུར་མིན་སེམས་ཚབ་སྐྱེ་གཞི་ཞིག་ཆགས་ཡོད་པ་རེད།  གལ་ཏེ་ད་ཆའི་གནས་སྟངས་འདི་དག་མུ་མཐུད་ཀྱིས་སློབ་ཕྲུག་མང་དག་ཅིག་སློབ་སྦྱོང་མཚམས་འཇོག་བྱས་ཡིན་ན་ང་ཚོའི་རྒྱལ་ཁབ་ཀྱི་འཐབ་རྩོད་དང་མི་རིགས།  སྤྱི་ཚོགས་བཅས་པར་གྱོང་ཆེན་པོ་ཞིག་ཆགས་རྒྱུ་ཉག་ཅིག་རེད། མ་འོངས་པར་ལོ་༣༠།༤༠རྗེས་བོད་ཀྱི་སྤྱི་ཚོགས་ཀྱི་ཤེས་ཡོན་གནས་སྟངས་ཇི་འདུ་ཞིག་ཏུ་འགྱུར་གྱི་ཡོད་དམ།”

གོང་ཞུས་གླེང་བརྗོད་བྲིས་ནས་ད་བར་ལོ་༣༠ཕྱིན་མེད་རུང་གནས་སྟངས་གཅིག་གསལ་པོ་རེད་བསམ། དེང་སློབ་སྦྱོང་མཇུག་འཁྱོངས་མ་བྱེད་མཁན་དེ་ཉུང་ཤས་ཡིན་གྱི་རེད། བཙན་བྱོལ་ནང་བོད་ཕྲུག་ཕལ་མོ་ཆེས་སློབ་སྦྱོང་གི་གལ་གནས་གསལ་པོ་མཁྱེན་གྱི་ཡོད་པ་ཚོར། འོན་ཀྱང་དེང་གི་ན་གཞོན་ཚོས་ཁོང་ཚོའ་ཤེས་ཡོན་གནས་ཚད་ཞན་དུ་ཕྱིན་ཡོད་པ་ཁས་ལེན་གནང་གི་ཡོད་དམ།

Advertisements

བོད་ཀྱི་དཀའ་རྙོག་དེར་རྒྱ་ནག་གཞུང་གི་གདོང་ལེན་བྱེད་ཐབས་ཐོག་དཔྱད་ཞིབ་ཞིག

 

བོད་ཀྱི་དཀའ་རྙོག་དེར་རྒྱ་ནག་གཞུང་གི་གདོང་ལེན་བྱེད་ཐབས་ཐོག་དཔྱད་ཞིབ་ཞིག

བུ་ཆུང་ཚེ་རིང་།

༼རྒྱལ་སྤྱིའི་བོད་དོན་ལས་འགུལ་གྱི་དྲ་ཚིགས་ནས།༽

 

༢༠༡༣ཟླ་ བ་༡ཚེས་༣༡ཉིན་ཨ་མེ་རི་ཀའི་གྲོས་ཚོགས་ཀྱི་ཚོགས་ཁང་ཞིག་ནང་བོད་དང་། ནང་སོག ཤར་ཏུར་ཀི་སི་ཐན་གྱི་གནས་སྟངས་དང་། དེའི་རྐྱེན་རྒྱ་ནག་ནང་མི་རིགས་ཀྱི་དཀའ་རྙོག་ཡོང་རྒྱུ་ཡིན་མིན་ཐོག་བགྲོ་གླེང་ཞིག་ནང་གུས་ནས་གཤམ་གི་དོན་གནས་ཐོག་གཏམ་བཤད་བྱས། བགྲོ་གླེང་དེ་ནི་ཨ་རིའི་ནང་རྒྱ་རིགས་ཀྱི་ཚོགས་པ་ཞིག་ནས་གོ་སྒྲིག་གནང་བ་རེད།

Watch the video

 

བར་ སྐབས་ཞིག་ནས་བོད་ནང་རང་ལུས་མེར་སྲེག་གཅིག་རྗེས་གཉིས་མཐུད་གནང་བ་དེས་ད་ལྟ་ བོད་ཀྱི་ཡ་ང་བའི་གནས་སྟངས་དེ་མཚོན་གྱི་ཡོད། འོན་ཀྱང་དེ་འབྱུང་རྐྱེན་བོད་ཀྱི་དཀའ་རྙོག་དེར་རྒྱ་ནག་གཞུང་ནས་གདོང་ལེན་ བྱེད་སྟངས་དེ་འཕྲལ་ཕུགས་གཉིས་དང་བོད་རྒྱ་གཉིས་ཀར་ཕན་ཐོག་མེད་པ་བྱུང་ཞིང་། བོད་ཐོག་རྒྱ་ནག་གིས་སྲིད་བྱུས་ནོར་པ་ལག་ལེན་ལྟར་བཞིན་པ་དེས་བོད་ཀྱི་དཀའ་ རྙོག་དེ་ཛ་དྲག་ཏུ་གཏོང་བཞིན་པ་རེད།

རྒྱ་ ཆེ་བའི་ཕྱོགས་ཐོག་ནས་གཟིགས་ན་རྒྱ་ནག་ནས་བོད་ཀྱི་དཀའ་རྙོག་དེ་གདོང་ལེན་བྱེད་ ཐབས་ལམ་གཉིས་བརྒྱུད་གནང་བཞིན་འདུག གཅིག་ནི་དཀའ་རྙོག་དེ་བོད་མི་ལྟ་བུ་གྲངས་ཉུང་མི་རིགས་ཟེར་བ་ཚོར་རྩ་ཁྲིམས་ནང་ གསལ་བའི་ཐོབ་ཐང་དམིགས་བསལ་འགའ་ཞིག་ཡོད་པའི་རྐྱེན་ཡིན་པའི་ཡིད་ཆེས་ཀྱིས་ཐོབ་ ཐང་དེ་ཚོ་མེད་པ་བཟོ་ཐབས་གནང་། དེའི་དཔེ་མཚོན་ནི་༢༠༡༡ཟླ་༡༢ནང་རྒྱ་ནག་འཐབ་ཕྱོགས་གཅིག་གྱུར་གྱི་བློན་ཆེན་ གཞོན་པ་ཀྲུའུ་ཝེ་ཆུན་ནས་གཞུང་འབྲེལ་གསར་ཤོག་ཞིག་ནང་དེང་རྒྱ་ནག་ནང་བྱུང་ བཞིན་པའི་མི་རིགས་ཀྱི་དཀའ་རྙོག་རྣམས་མི་རིགས་ཚོར་སྲིད་བྱུས་ཐ་དད་ཞིག་ཡོད་ པའི་རྐྱེན་ཡིན་པས་དེ་མེད་པ་བཟོ་དགོས་གསུངས། སྐུ་ཞབས་ཀྲུའུ་ནས་གསུངས་པ་དེ་དེ་སྔོན་རྒྱ་ནག་གི་དཔྱད་ཞིབ་པ་འགའ་ཞིག་ནས་ གསུངས་ཡོད་ཞིང་དེ་ཐོག་དེང་རྒྱ་ནག་ནང་གླེང་མོལ་ཡོང་བཞིན་པ་ཡིན། འོན་ཀྱང་ཁོང་ནི་བོད་ཀྱི་གནད་དོན་ཐོག་འགན་ཡོད་མཁན་རྒྱ་ནག་གི་དཔོན་རིགས་ཞིག་ ཡིན་པ་དེས་ཁོང་གི་དགོངས་འཆར་དེར་གོ་བ་གསར་པ་ཞིག་ཡོད་དགོས། གང་ལྟར་ད་ལྟའི་ཆར་ཁོང་གི་དགོངས་འཆར་དེར་ལག་ལྟར་བྱུང་མེད་པ་ལྟ་བུ་འདུག་པས་ དེས་ད་ལྟའི་རྒྱ་ནག་གི་དབུ་ཁྲིད་ཚོའི་དབར་མི་རིགས་གནད་དོན་ཐོག་ཁ་མཐུན་གྱི་ མེད་པ་མཚོན།

ཁོང་ ཚོས་ལག་ལྟར་བྱེད་བཞིན་པའི་ཐབས་ལམ་གཉིས་པ་དེ་ནི་བོད་མིར་མི་རིགས་དབྱེ་འབྱེད་ ཀྱི་སྲིད་བྱུས་དེ་ཡིན། ཉེ་བའི་ཆར་བྱུང་བའི་དེའི་དཔེ་མཚོན་ཁག་གཅིག་ནི་གཤམ་གསལ་ཡིན།

༡། དེང་རྒྱ་ནག་ནང་རྒྱ་རིགས་ཚོར་སྔར་ལས་ཆེ་བའི་སྨྲ་བརྗོད་དང་། འགྲོ་བསྐྱོད། འདུ་འཛོམས་སོགས་ཀྱི་རང་དབང་ཡོད་ལ་བོད་ཀྱི་ས་ཁུལ་ཁག་ལ་སྔར་ལས་དམ་དྲག་ཤུགས་ ཆེན་བཏང་ཞིང་བོད་ཡོངས་རྫོགས་བཙོན་ཁང་ཆེན་པོ་ལྟ་བུར་སྒྱུར་ཡོད།

༢། བར་སྐབས་ནས་རྒྱ་ནག་གིས་ཕྱི་སྐྱོད་ལག་ཁྱེར་རག་རྒྱུ་ལས་སླ་བ་བཟོས་ཞིང་རྒྱ་མི་ ཡིན་ན་ཕལ་ཆེར་བདུན་ཕྲག་གཅིག་ནང་ལག་ཁྱེར་གསར་པ་དེ་རག་ཐུབ་ཀྱི་ཡོད། འོན་ཀྱང་བོད་མི་ཚོར་དེང་ལག་ཁྱེར་རག་རྒྱུ་དཀའ་ཁག་ཆེ་རུ་ཕྱིན་ཡོད་པ་མ་ཟད་བོད་ མི་འགའ་ཞིག་ལ་ལག་ཁྱེར་ཡོད་པ་དེ་ཚོའང་ཕྱིར་བསྡུ་རུབ་བྱེད་པའི་གནས་སྟངས་ཡིན།

༣། ཉེ་ཆར་རྒྱ་ནག་ནས་སྤོབ་པའི་ཐོག་བོད་ནང་ཡུལ་སྐོར་སྤྲོ་འཁྱམས་ཡོང་མཁན་མང་དུ་ འགྲོ་ཡི་ཡོད་པ་དང་། ༢༠༡༢ ལོར་ལྷ་སར་ཡུལ་སྐོར་སྤྲོ་འཁྱམས་པ་གྲངས་འབོར་ས་ཡ་༦་༥བྱུང་ཡོད་པའི་གསལ་ བསྒྲགས་བྱས། འོན་ཀྱང་དེང་བོད་མི་ཚོར་ལྷ་ས་སོགས་བོད་ཀྱི་ས་ཁུལ་ཁག་ནང་འགྲུལ་བསྐྱོད་བྱེད་ རྒྱུར་དམ་དྲག་ཆེ་རུ་ཕྱིན་ཡོད། མདོ་ཁམས་སོགས་ནས་བོད་མི་ལྷ་སར་བསྐྱོད་འདོད་ཡོད་མཁན་ཚོས་ཉུང་ཐར་བཀའ་ཁྲོལ་མ་ འདྲ་བ་ཁག་བཞི་ཞུས་དགོས་ཡོད།

 

༤། རྒྱ་ནག་ནས་༢༠༡༢ལོར་ནག་ཉེས་ཁྲིམས་ལ་བསྐྱར་བཅོས་བྱས་ནས་དེ་ནང་འགྲོ་བ་མིའི་ ཐོབ་ཐང་ལ་སྲུང་སྐྱོབ་བྱེད་རྒྱུའི་ཆ་རྐྱེན་སོགས་ལེགས་བཅོས་ཀྱི་རྣམ་པ་ཡོད་པ་ ཕྱིར་བསྒྲགས་བྱེད་པའི་སྐབས་བོད་པའི་ཐོག་ཁྲིམས་དམ་དུ་བཏང་ཞིང་ད་ཆ་བོད་མི་རང་ ལུས་མེར་སྲེག་ལྟ་བུར་མཚོན་ན་ལས་འགུལ་དེ་ནག་ཉེས་ཡིན་པ་མ་ཟད་ལས་འགུལ་སྤེལ་ མཁན་གྱི་ནང་མི་དང་ངོ་ཤེས་སོགས་ཀྱང་ནག་ཉེས་ཡོད་པའི་སྡིག་ར་བསྐུལ་བཞིན་པའི་ དུས་ཡིན།

གོང་གི་གནས་སྟངས་དེས་དེང་བོད་མིའི་འཚོར་བ་གང་འདྲ་ཡོང་གི་ཡོད་མིན་གསལ་པོ་རྟོགས་ཐུབ།

རྒྱ་ནག་དམར་ཤོག་ཚོགས་པའི་འགོ་ཁྲིད་ཀྱི་གོ་གནས་སྟེང་གི་བོད་མི་དག

བུ་ཆུང་ཀེ་ཚེ་རིང་།

དབྱིན་ཡིག་ནང་མ་རྩོམ་ལ་གཟིགས་ན་འདི་རུ་བསྣུན།

རྒྱ་ནག་དམར་ཤོག་ཚོགས་པས་༢༠༡༢ལོའི་སྤྱི་ཟླ་༡༡པའི་ཚེས་༨ཉིན་ནས་བཟུང་དམར་ཤོག་འཐུས་མིའི་ཚོགས་ཆེན་སྐབས་བཅོ་བརྒྱད་པ་འཚོགས་རྒྱུ་ཡིན་པའི་གསལ་བསྒྲགས་མཐའ་མཇུག་ཏུ་བསྐྱངས་སོང་། དེར་བརྟེན། ངས་དེའི་གལ་གནད་རང་བཞིན་ལ་བོད་མི་ཞིག་གི་བསམ་ཚུལ་ཐོག་ནས་ལྟ་འདོད་བྱུང་། ཡིན་ཡང་། ལྟ་སྟངས་མི་འདྲ་བ་ཞིག་གི་སྒང་ནས་གླེང་གི་ཡིན།

རྒྱ་ནག་དམར་ཤོག་འཐུས་མིའི་ཚོགས་ཆེན་སྐབས་བཅོ་བརྒྱད་པའི་ནང་བདམས་ཐོན་བྱུང་བའི་རྒྱ་ནག་གི་འགོ་ཁྲིད་གསར་པས་རྒྱལ་ཁབ་ཀྱི་མ་འོངས་བའི་ཁ་ཕྱོགས་ཐག་གཅོད་བྱ་ཡི་ཡིན་པ་བཤད་མི་དགོས་བ་ཞིག་རེད་ལ། ཐག་གཅོད་གཏན་འབེབས་དེས་བོད་མི་ཚོའི་ཐོག་ལ་ཤུགས་རྐྱེན་ཞིག་ཐེབས་ངེས་པའང་བརྗོད་ག་ལ་དགོས། གང་ལྟར་ཡང་། ངས་གནད་དོན་དེའི་ཕྱོགས་ངོས་གཞན་ཞིག་ལ་ལྟ་འདོད་བྱུང་། དེ་ནི་རྒྱ་ནག་དམར་ཤོག་ཚོགས་པའི་ཆེས་མཐོའི་མདུན་བསྐྱོད་དཔུང་སྒྲིག་ནང་གི་བོད་མིའི་གནས་བབ་ཀྱི་རང་བཞིན་སྐོར་ལ་ཡིན།

རྒྱ་ནག་དམར་ཤོག་ཚོགས་པའི་འཐུས་མི་ཚོས་དམར་ཤོག་ཚོགས་པའི་སྒྲིག་འཛུགས་མཐོ་ཤོས་གསུམ་༼ངས་ཆབ་སྲིད་རྒྱུན་ལས་ཨུ་ཡོན་ལྷན་ཁང་དང་ཆབ་སྲིད་ཅུས་ལོགས་སུ་བསྐྱུར་འཇོག་གི་ཡིན། གང་ཡིན་ཞེ་ན། དེ་གཉིས་ནི་ད་ལྟའི་དུས་སྐབས་ཀྱི་ལས་འཆར་ནང་གི་བོད་མི་ཚོ་ལྟ་བུའི་མི་རྣམས་ལ་མཚོན་ན་རྨི་ལམ་ལྟ་བུ་ཡིན་པས་རེད།༽གྱི་ཚོགས་མིའི་ཁུངས་སུ་ཞུགས་པར་རེ་འདོད་དྲག་པོ་བྱེད་ཆོག་པ་རེད། དེ་དག་ནི་དབུས་ཨུ་ཡོན་ལྷན་ཁང་གི་རྒྱུན་ལས་ཚོགས་མི་དང་འདེམས་ཀའི་བརྗེ་ལེན་ཚོགས་མི། དབུས་དམར་ཤོག་སྒྲིག་འཛུགས་ཞིབ་བཤེར་ཨུ་ཡོན་ལྷན་ཁང་གི་འཐུས་མི་བཅས་ལ་རེ་ལྟོས་བྱེད་ཆོག་པ་རེད། དབུས་ཨུ་ཡོན་ལྷན་ཁང་ནི་རྒྱ་ནག་དབུས་དམར་ཤོག་ཚོགས་པའི་ནང་གི་སྲིད་ཇུས་གཏན་འབེབས་གནང་མཁན་ཆེས་མཐོ་ཤོས་དེ་ཡིན་པའི་ཆ་འཇོག་གནང་གི་ཡོད་རེད།

སྒྲིག་འཛུགས་འདི་ཚོའི་གལ་ཆེན་རང་བཞིན་སྟོན་ཆེད། དམར་ཤོག་ཚོགས་པའི་འཐུས་མིིའི་ཚོགས་ཆེན་སྐབས་རེ་རེར་ཁོང་ཚོའི་ཚོགས་མི་དག་གསལ་བསྒྲགས་གནང་གིན་ཡོད། དམར་ཤོག་ཚོགས་པའི་དབུས་ཨུ་ཡོན་ལྷན་ཁང་ལ་རྒྱ་ནག་གིས་བོད་མི་ཚོར་འཛིན་པའི་སྲིད་ཇུས་དེ་གོ་རིམ་ངེས་ཅན་དུ་བཟོ་བར་ལས་འགན་ཞིག་ཡོད་ངེས་པ་རེད། པེ་ཅིན་གྱིས་བོད་ཀྱི་སྟེང་ལ་སྤེལ་བཞིན་པའི་བོད་ལྗོངས་ལས་དོན་གླེང་སྟེགས་ (Tibet Work Forums) ཀྱི་བྱེད་སྒོའི་བསྟར་རིམ་དེ་དག་ཡོངས་རྫོགས་དམར་ཤོག་ཚོགས་པའི་བཀའ་དགོངས་ལྟར་སྒྲུབ་ཀྱི་ཡོད་པ་རེད།

ཕྱིར་དྲན་བྱེད་སྤྲོ་བ་ཞིག་ཡོད་པ་ནི་སྤྱི་ལོ་༡༩༥༣་ལོའི་ཟླ་༣་པའི་ཚེས་༡༦་ཉིན་“ནང་མའི་ཚོགས་པས་རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང”་ལ་“ཧན་རྒྱ་ནག་ཆེན་པོའི་ཞེན་ཁོག་རིང་ལུགས་”སྐོར་ལ་འཆར་འགོད་ཟིན་བྲིས་ཤིག་བྲིས་འདུག་པ་གཤམ་གསལ་ལྟར། “ད་ཡོད་གནས་ཚུལ་གྱི་ཐོག་ནས་གྱོད་ཞིབ་གནང་ན། དབུས་ཨུ་ཡོན་ལྷན་ཁང་གིས་གྲངས་ཉུང་མི་རིགས་ཀྱི་ཆབ་འབངས་ཡོད་ས་གང་དུ་དཀའ་ངལ་ཅི་ཞིག་ཡོད་ན་དེ་དག་ཐག་གཅོད་ཀྱི་ཐབས་ལམ་འདོན་དགོས་པའི་སྤྱིར་བཏང་གི་སྒྲིག་གཞི་ཞིག་ལག་བསྟར་བྱེད་ཀྱི་ཡོད་ཅིང་། གནས་སྟངས་ཁ་ཤས་ནང་ལ་དཀའ་ངལ་ཧ་ཅང་ཚབས་ཆེན་དེ་འདྲ་འདུག ཕྱི་ངོས་སུ་ཡོད་ཚད་ཁུ་སིམ་སིམ་ཡིན་རུང་། དོན་དངོས་སུ་དེ་རུ་ཧ་ཅང་ཚབས་ཆེ་བའི་དཀའ་ངལ་ཁ་ཤས་ཤིག་འདུག འདས་པའི་ལོ་ངོ་གཉིས་སམ་གསུམ་ནང་ས་ཆ་འདྲ་མིན་ལ་མངོན་གསལ་དུ་བྱུང་བའི་དོན་དག་དག་གིས་གནད་དོན་གཅིག་སྟོན་གྱིན་ཡོད་པ་ནི་ཧན་རྒྱ་ནག་ཆེན་པོའི་ཞེན་ཁོག་རིང་ལུགས་ཕལ་ཆེར་ས་ཆ་གང་སར་གནས་ཡོད་པ་དེའོ།། གལ་ཏེ་ང་ཚོས་དུས་ཐོག་ཏུ་སློབ་གསོ་སྤྲོད་མ་ཐུབ་པ་དང་དམར་ཤོག་ཚོགས་པ་ནང་གི་ཧན་རྒྱ་ནག་ཆེན་པོའི་ཞེན་ཁོག་རིང་ལུགས་དང་མི་དམངས་ཁྲོད་དུ་གནས་པའི་ཞེན་འཛིན་རིང་ལུགས་དེ་ལས་བློ་རྩ་བརྟན་པོས་ཐར་མ་ཐུབ་ན་དེ་ནི་ཧ་ཅང་ཉེན་ཁ་ཆེན་པོ་ཞིག་ཏུ་འགྱུར་གྱི་རེད། དམར་ཤོག་ཚོགས་པ་ནང་སྟོན་གྱིན་པའི་གྲངས་ཉུང་མི་རིགས་དག་གི་བར་གྱི་དཀའ་ངལ་དང་ས་ཁུལ་མང་པོའི་མི་དམངས་ཁྲོད་དུ་ཧན་རྒྱ་ནག་ཆེན་མོའི་ཞེན་ཁོག་རིང་ལུགས་ཀྱི་གནས་ཚད་དེ་ཚབས་ཆེན་པོ་ཞིག་ལ་བསླེབས་འདུག དེ་ནི་དེའི་རྗེས་ཤུལ་གྱི་གནད་དོན་ཙམ་མ་རེད། བཤད་སྟངས་གཞན་ཞིག་གི་ཐོག་ནས་ཞུ་ན། འབྱོར་ལྡན་གྲལ་རིམ་གྱི་ལྟ་བས་བློ་མཐུན་དེ་ཚོའི་སེམས་པ་དག་དབང་བསྒྱུར་བྱས་འདུག་ཅིང་། མཱ་ཁི་སི་རིང་ལུགས་ཀྱི་སློབ་གསོ་ཐོབ་མེད་པའི་བློ་མཐུན་དག་གི་སེམས་པའང་དབང་བསྒྱུར་བྱས་འདུག ཁོང་ཚོས་དབུས་ཨུ་ཡོན་ལྷན་ཁང་གི་རྒྱལ་འབངས་སྲིད་ཇུས་རྟོགས་མི་འདུག དེར་བརྟེན། ངེས་པར་དུ་བརྩོན་པ་ཆེན་པོའི་ཐོག་ནས་སློབ་གསོ་སྤེལ་དགོས། དེ་ལྟར་བགྱིས་ན། དཀའ་ངལ་འདི་རིམ་བཞིན་རིམ་བཞིན་སེལ་ཐུབ་ཀྱི་ཡོད། དེར་མ་ཟད། ཚགས་པར་དག་གིས་ཁྱད་ཆོས་ངེས་ཅན་ལྡན་པའི་དངོས་ཡོད་གནས་ཚུལ་གཞིར་བཞག་སྟེ་བྲིས་པའི་རྩོམ་ཡིག་མང་པོ་སྤེལ་ནས་ཧན་རྒྱ་ནག་ཆེན་མོའི་ཞེན་ཁོག་རིང་ལུགས་ལ་ཡོངས་གྲགས་ཀྱི་ཐོག་ནས་རྣག་ཐོག་ཁབ་གཙགས་བྱེད་དགོས། ད་དུང་དམར་ཤོག་ཚོགས་པའི་ཚོགས་མི་ཚོ་དང་མི་དམངས་ཚོར་སློབ་གསོ་སྤྲོད་དགོས་སོ།། ”

ཐ་ན་དུས་ད་ལྟའང་རྟོག་ཞིབ་དེ་ལག་ལེན་དུ་འདེབས་ཀྱིན་མེད་པ་འདྲ། བོད་ནང་གི་གནས་སྟངས་ཇེ་སྡུག་ཏུ་གཏོང་མཁན་གྱི་རྒྱུ་རྐྱེན་གཅིག་ནི་ཧན་རྒྱ་མི་ཚོའི་མི་རིགས་རིང་ལུགས་ཀྱི་ལྟ་བ་དེའོ།། ངས་དམར་ཤོག་ཚོགས་པའི་འཐུས་མིའི་ཚོགས་ཆེན་སྐབས་བཅོ་བརྒྱད་པ་དང་དེའི་རྗེས་ཀྱི་རྒྱ་ནག་གི་འགོ་ཁྲིད་ཀྱིས་གནད་དོན་འདིར་དོ་གལ་ཆེན་པོའི་ཐོག་ནས་ཞིབ་ལྟ་གནང་བའི་རེ་བ་བྱེད་ཀྱི་ཡོད།

དབུས་ཨུ་ཡོན་ལྷན་ཁང་གི་བོད་པ་འཐུས་མི་ཚོས་བསམ་ཞིབ་གོ་བསྡུར་དག་གི་སྐབས་སུ་ཁོང་ཚོའི་སྦ་གསང་མེད་པའི་བསམ་ཚུལ་ཚད་ཅི་ཙམ་ཞིག་གི་སར་འདོན་ཐུབ་མིན་ངས་ད་ལྟ་གཏན་འཁེལ་བྱེད་ཐུབ་ཀྱི་མི་འདུག
གང་ལྟར་ཡང་། ད་ལྟའི་སྐབས་བཅུ་བདུན་པའི་དབུས་ཨུ་ཡོན་ལྷན་ཁང་ལ་འཐུས་མི་༢༠༤་ཡོད་པ་ལས་གཉིས་བོད་པ་རེད།༼ལེགས་མཆོག་དང་བྱམས་པ་ཕུན་ཚོགས།༽བརྗེ་ལེན་གྱི་འཐུས་མི་༡༦༧་ལས་བོད་མི་གཉིས་ཡོད།༼བསྟན་ཁོ་དང་རྡོ་རྗེ།༽དབུས་དམར་ཤོག་རྩ་འཛུགས་ཞིབ་བཤེར་ཨུ་ཡོན་ལྷན་ཁང་ལ་འཐུས་མི་༡༢༧་ཡོད་པ་ལས་གཉིས་ནི་བོད་པ་རེད། ༼ རིན་ཆེན་རྒྱལ་དང་གུ་རུ་ཚེ་འགོ ༽

སྐབས་བཅུ་དྲུག་པའི་དབུས་ཨུ་ཡོན་ལྷན་ཁང་ལ་རྒྱུན་ལས་འཐུས་མི་བོད་མི་གསུམ་དང་དེ་བཞིན་དུ་བརྗེ་ལེན་འཐུས་མིའང་གསུམ་བྱུང་ཡོད།
དབུས་ཨུ་ཡོན་ལྷན་ཁང་ནང་གི་བོད་པའི་འཐུས་མི་གསར་པ་སུ་སུ་ཡིན་ངེས་སམ། དེ་རུ་ག་ཚོད་ཡོད་ངེས་སམ། འཚོགས་ལ་ཉེ་བའི་དམར་ཤོག་ཚོགས་པའི་འཐུས་མིའི་ཚོགས་ཆེན་ལ་བོད་པའི་སྐུ་ཚབ་མི་སྣ་སུམ་ཅུ་ལས་བརྒལ་བ་ཕེབས་སྲིད་པ་འདྲ། དམར་ཤོག་ཚོགས་པའི་འཐུས་མི་ཚོས་དབུས་ཨུ་ཡོན་ལྷན་ཁང་གསར་པ་འོས་འདེམས་བྱ་རྒྱུ་རེད། ད་ལྟའི་བར་དུ་བོད་པའི་འཐུས་མི་ག་ཚོད་བདམས་ཡོད་པའི་རང་བཞིན་སྐོར་ལ་རིག་པ་ཞིག་འདོན་ཆེད། དམར་ཤོག་ཚོགས་པའི་དབུས་ཨུ་ཡོན་ལྷན་ཁང་ནང་ལ་ཚོགས་ཞུགས་བྱས་པའི་བོད་མི་ཚོའི་མིང་གཞུང་ཞིག་ངས་འདས་པའི་ལོ་ངོ་ཁ་ཤས་ཤིག་གི་སྔོན་ནས་བཟུང་ཕྱོགས་སྒྲིག་བྱས་ཡོད་པ་

གཤམ་གསལ་ལྟར།

༢༠༠༧ལོའི་ཟླ་༡༠པ། རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་སྐབས་བཅུ་བདུན་པ།
༡ ལེགས་མཆོག ༼རྒྱང་རྩེ།༽
༢ བྱམས་པ་ཕུན་ཚོགས།༼ཆབ་མདོ།༽

རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་གི་སྐབས་བཅུ་བདུན་པའི་བརྗེ་ལེན་འཐུས་མི།
༡ བསྟན་ཁོ། ༼ མཚོ་ལྷོ།༽
༢ རྡོ་རྗེ། ༼རྒྱ་ཚ།༽

རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་གི་སྐབས་བཅུ་བདུན་པའི་འཐུས་མིའི་ཚོགས་ཆེན་སྐབས་བདེམས་ཐོན་བྱུང་བའི་རྒྱ་གཞུང་དབུས་དམར་ཤོག་རྩ་འཛུགས་ཞིབ་བཤེར་ལྷན་ཁང་གི་འཐུས་མི་དག་ནི།
༡ རིན་ཆེན་རྒྱལ། ༼ ཨ་མདོ།༽
༢ གུ་རུ་ཚེ་འགོ ༼རྔ་བ།༽

༢༠༠༢ལོའི་ཟླ་༡༠པའི་ཚེས་༨ནས་ཚེས་༡༤བར། རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་སྐབས་བཅུ་དྲུག་པ།
༡ ལེགས་མཆོག ༼རྒྱང་རྩེ།༽
༢ རྡོ་རྗེ་ཚེ་རིང་། ༼བླ་བྲང་།༽

རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་གི་སྐབས་བཅུ་དྲུག་པའི་བརྗེ་ལེན་འཐུས་མི།
༡ བྱམས་པ་ཕུན་ཚོགས། ༼ཆབ་མདོ།༽
༢ རིན་ཆེན་རྒྱལ། ༼ཨ་མདོ།༽
༣ གུ་རུ་ཚེ་འགོ ༼རྔ་བ།༽

སྤྱི་ལོ་༢༠༠༢ལོར། རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་གི་སྐབས་བཅུ་དྲུག་པའི་འཐུས་མིའི་ཚོགས་ཆེན་སྐབས་བདེམས་ཐོན་བྱུང་བའི་རྒྱ་གཞུང་དབུས་དམར་ཤོག་རྩ་འཛུགས་ཞིབ་བཤེར་ལྷན་ཁང་གི་འཐུས་མི་དག་ནི།
༡ བུ་ཆུང་། ༼འཕྱོངས་རྒྱས།༽
༢ པད་མ། ༼སྐྱེ་རྒུ་མདོ།༽

སྤྱི་ལོ༡༩༩༧ལོའི་སྤྱི་ཟླ་༩པའི་ཚེས་༡༢ནས་ཚེས་༡༨བར། རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་སྐབས་བཅོ་ལྔ་པ།
༡ རག་རྡི། ༼ནག་ཆུ།༽
༢ རྡོ་རྗེ་ཚེ་རིང་། ༼བླ་བྲང་།༽

སྤྱི་ལོ་༡༩༩༧ལོར། རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་གི་སྐབས་བཅོ་ལྔ་པའི་བརྗེ་ལེན་འཐུས་མི།
༡ ལེགས་མཆོག ༼རྒྱང་རྩེ།༽
༢ བསྟན་འཛིན། ༼ནག་ཆུ།༽
༣ གུ་རུ་ཚེ་འགོ ༼རྔ་བ།༽

སྤྱི་ལོ༡༩༩༢ལོའི་སྤྱི་ཟླ་༡༠པའི་ཚེས་༡༢ནས་ཚེས་༡༨བར། རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་སྐབས་བཅུ་བཞི་པ།
༡ རག་རྡི། ༼ནག་ཆུ།༽
༢ རྡོ་རྗེ་ཚེ་རིང་། ༼བླ་བྲང་།༽

སྤྱི་ལོ་༡༩༩༢ལོར། རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་གི་སྐབས་བཅུ་བཞི་པའི་འཐུས་མིའི་ཚོགས་ཆེན་སྐབས་བདེམས་ཐོན་བྱུང་བའི་རྒྱ་གཞུང་དབུས་དམར་ཤོག་རྩ་འཛུགས་ཞིབ་བཤེར་ལྷན་ཁང་གི་འཐུས་མི་ནི།
༡ པ་སངས། ༼ལྷོ་ཁ།༽
སྤྱི་ལོ་༡༩༩༢ལོར། རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་གི་སྐབས་བཅུ་བཞི་པའི་བརྗེ་ལེན་འཐུས་མི།
༡ བསྟན་འཛིན། ༼ནག་ཆུ།༽
༢ རྒྱལ་མཚན་ནོར་བུ། ༼འབའ་ཐང་།༽

སྤྱི་ལོ༡༩༨༧ལོའི་སྤྱི་ཟླ་༩པའི་ཚེས་༢༥ནས་སྤྱི་ཟླ་༡༠པའི་ཚེས་༡བར། རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་སྐབས་བཅུ་གསུམ་པའི་འཐུས་མི།
༡ རག་རྡི། ༼ནག་ཆུ།༽
༢ རྡོ་རྗེ་ཚེ་རིང་། ༼བླ་བྲང་།༽

སྤྱི་ལོ་༡༩༨༧ལོར། རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་གི་སྐབས་བཅུ་གསུམ་པའི་འཐུས་མིའི་ཚོགས་ཆེན་སྐབས་བདེམས་ཐོན་བྱུང་བའི་རྒྱ་གཞུང་དབུས་དམར་ཤོག་རྩ་འཛུགས་ཞིབ་བཤེར་ལྷན་ཁང་གི་འཐུས་མི་ནི།
༡ པ་སངས། ༼ལྷོ་ཁ།༽

སྤྱི་ལོ༡༩༨༢ལོའི་སྤྱི་ཟླ་༩པའི་ཚེས་༡ནས་ཚེས་༡༡བར། རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་སྐབས་བཅུ་གཉིས་པའི་འཐུས་མི།
༡ རག་རྡི། ༼ནག་ཆུ།༽
༢ པ་སངས། ༼ལྷོ་ཁ།༽

སྤྱི་ལོ་༡༩༨༢ལོར། རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་གི་སྐབས་བཅུ་གཉིས་པའི་འཐུས་མིའི་ཚོགས་ཆེན་སྐབས་བདེམས་ཐོན་བྱུང་བའི་རྒྱ་གཞུང་དབུས་དམར་ཤོག་རྩ་འཛུགས་ཞིབ་བཤེར་ལྷན་ཁང་གི་འཐུས་མི་ནི།
༡ རྡོ་རྗེ་ཚེ་རིང་། ༼བླ་བྲང་།༽

སྤྱི་ལོ༡༩༧༧ལོའི་སྤྱི་ཟླ་༨པའི་ཚེས་༡༢ནས་ཚེས་༡༨བར། རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་སྐབས་བཅུ་གཅིག་པའི་འཐུས་མི།
༡ པ་སངས། ༼ལྷོ་ཁ།༽
༢ སངས་རྒྱས་ཡེ་ཤེས། ༼ཁམས།༽
སྤྱི་ལོ༡༩༧༧ལོར། རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་གི་སྐབས་བཅུ་གཅིག་པའི་བརྗེ་ལེན་འཐུས་མི།
༡ རག་རྡི། ༼ནག་ཆུ།༽

སྤྱི་ལོ༡༩༧༣ལོའི་སྤྱི་ཟླ་༨པའི་ཚེས་༢༤ནས་ཚེས་༢༨བར། རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་སྐབས་བཅུ་པའི་འཐུས་མི།
༡ པ་སངས། ༼ལྷོ་ཁ།༽
༢ སངས་རྒྱས་ཡེ་ཤེས། ༼ཁམས།༽

སྤྱི་ལོ༡༩༦༩ལོའི་སྤྱི་ཟླ་༥པའི་ཚེས་༡ནས་ཚེས་༢༤བར། རྒྱ་ནག་དམར་ཤོག་ཚོགས་པའི་དབུས་ཨུ་ཡོན་ལྷན་ཁང་སྐབས་དགུ་པའི་འཐུས་མི།
༡ སངས་རྒྱས་ཡེ་ཤེས། ༼ཁམས།༽

དབྱིན་ཡིག་ནས་བོད་ཡིག་ཐོག་ཕབ་སྒྱུར་་ཞུ་མཁན་སྐར་ཁུང་རྩོམ་སྒྱུར་ཚོགས་ཆུང་། ཐུགས་རྗེ་ཆེ།

ཨོ་སྦ་མ། རོམ་ཎི་དང་ཨ་མེ་རི་ཀའི་བོད་མི་ཚོ།

ད་ཆ་ཨ་མེ་རི་ཀའི་སྤྱི་མཐུན་ཚོཌ་པའི་ངོས་ནས་ཨ་རིའི་སྲིད་འཛིན་འོས་མིར་སྐུ་ཞབས་མིཊ་རོམ་ཎི་ཐུགས་གཏན་འཁེལ་བ་ལྟ་བུ་ཡིན་དུས་ཨ་མེ་རི་ཀའི་བོད་མི་ཚོས་འདི་ལོའི་སྲིད་འཛིན་འོས་བསྡུའི་ཐོག་དགོངས་པ་གཏིང་ཟབ་བཞེས་རྒྱུ་དུས་ལ་བབས་ཡོད།

སྤྱིར་བཏང་ཨ་མེ་རི་ཀའི་ནང་ཕྱིའི་རྒྱལ་ཁབ་ནས་ཡུལ་མི་གསར་པ་ཆགས་མཁན་ཚོའི་གོམས་སྲོལ་གཅིག་ནི་རང་ཉིད་ཀྱི་འོས་སུ་ལ་འཕེན་དགོས་མིན་དེ་གནད་དོན་གཅིག་གི་ཐོག་ནས་ཐུགས་ཐག་གཅོད་ཀྱི་ཡོད་པ་དེ་རེད།  ཨ་རིའི་བོད་མི་ཚོར་གནད་དོན་དེ་ནི་དམངས་གཙོ་ཚོགས་པའི་འོས་མི་སྦ་རག་ཨོ་སྦ་མ་དང་སྤྱི་མཐུན་ཚོགས་པའི་འོས་མི་རོམ་ཎི་གཉིས་ནས་སུས་བོད་ཐོག་ལས་དོན་ཤུགས་ཆེ་བ་གནང་ཐུབ་མིན་དེ་ཡིན།  ཨ་རིའི་བོད་མིས་རང་ཉིད་ཀྱི་ལྟ་བའི་ལངས་ཕྱོགས་གང་ཡིན་ལ་མ་ལྟོས་པར་གནད་དོན་འདི་ཁོ་ནའི་ཐོག་ནས་འོས་བསྡུའི་སྐོར་ཐག་གཅོད་གནང་གི་ཡོད་པ་དེ་གསལ་པོ་རེད།  དེ་སྔ་གུས་རང་གི་ངོ་ཤེས་ནང་དམངས་གཙོ་ཚོགས་པའི་ལྟ་བ་ཡོད་མཁན་བོད་མིས་སྤྱི་མཐུན་ཚོགས་པའི་འོས་མི་འཇོར་རྗེ་སྦུ་ཤི་ལགས་སུ་འོས་འཕེན་གནང་མཁན་ཡོད།

ཨ་མེ་རི་ཀའི་བོད་མི་ཚོ་ནི་ཨ་རིའི་ནང་གི་མི་རིགས་ཉུང་ཤོས་ཤིག་ཡིན་རུང་ང་ཚོའི་ནུས་པ་དེ་མི་རིགས་གཞན་དང་མ་འདྲ་བ་ཡོད་པས་དེ་བེད་སྤྱོད་ལེགས་པོ་ཡོང་ཆེད་ཨ་རིའི་བོད་མི་ཚོས་རྒྱལ་ཁབ་འདིའི་ཆབ་སྲིད་གནད་དོན་ཐོག་དགོངས་པ་གཏིང་ཟབ་པ་བཞེས་ཐུབ་ཐབས་གནང་དགོས།  དཔེར་ན་འདི་ལོའི་སྲིད་འཛིན་གྱི་འོས་བསྡུའི་ཐོག་གྲ་སྒྲིག་ཡག་པོ་ཡོང་པར་འོས་མི་གཉིས་ཀྱི་དགོངས་པ་གང་ཡིན་མཁྱེན་ཐུབ་ཐབས་གནང་དགོས་ཡོད།  སྐུ་ཞབས་ཨོ་སྦ་མ་ཡིན་ན་ཁོང་ནས་སྲིད་འཛིན་ཐེངས་གཅིག་གནང་ཡོད་པའི་སྐབས་ད་ང་དེ་གོང་གྲོས་ཚོགས་འཐུས་མི་གནང་བའི་སྐབས་སུ་བོད་དོན་ཐོག་དགོངས་པ་ག་རེ་བཞེས་ཡོད་མིན་ལོ་རྒྱུས་ཐོག་ཡོད།  དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་ནས་ཨ་མེ་རི་ཀའི་སྲིད་འཛིན་གནང་འདོད་ཡོད་མཁན་ཚོར་བོད་དོན་ཐོག་དྲི་ཤོག་ཕུལ་བར་སྐུ་ཞབས་ཨོ་སྦ་མས་བཀའ་ལན་ཡང་གནང་ཡོད།

སྐུ་ཞབས་རོམ་ཎི་ནས་ད་བར་བོད་དོན་ཐོག་དགོངས་ཚུལ་ག་རེ་ཡིན་མེད་སྐོར་ལོ་རྒྱུས་མེད་པ་མ་ཟད་ང་ཚོའི་དྲི་ཤོག་ལ་ད་བར་བཀའ་ལན་གནང་མེད། ཡིནའང་ཁོང་ནས་ད་བར་འདུ་འཛོམས་དང་གསར་འགྱུར་བརྒྱུད་ལམ་ཐོག་རྒྱ་ནག་ཐོག་དགོངས་པ་བཞེས་ཕྱོགས་ཐོག་བཀའ་གནང་ཡོད།

འོན་ཀྱང་འོས་མི་གཉིས་ཀྱི་དྲ་ཚིགས་ཐོག་ཕེབས་ཡིན་ན་ཁོང་གཉིས་ཀྱི་རྒྱ་ནག་ཐོག་དགོངས་པ་བཞེས་སྟངས་ག་རེ་ཡིན་མིན་དང་དེ་བཞིན་འགྲོ་བ་མིའི་གནད་དོན་ཐོག་དགོངས་ཚུལ་ག་རེ་ཡིན་མིན་སོགས་སྐོར་མཁྱེན་ཐུབ། གལ་ཏེ་དེ་འདྲའི་གནད་དོན་སྐོར་དྲ་ཚིགས་ཐོག་གསལ་གྱི་མེད་ན་དེས་འོས་མི་དེས་གནད་དོན་གལ་ཆེན་པོ་རྩིས་ཀྱི་ཡོད་མིན་གསལ་པོ་ཡིན།

གང་ལྟར་འདི་ལོའི་ཨ་རིའི་སྲིད་འཛིན་འོས་བསྡུར་ཨ་རིའི་བོད་མིས་སྔར་ལགས་མཉམ་ཞུགས་གནང་ནས་རང་ཉིད་ཀྱི་འདེམས་པའི་ཡུལ་འདིའི་གནད་དོན་ཐོག་ཐུགས་སྣང་ཡོང་བའི་རེ་བ་ཡིན།

བོད་མིས་རང་ལུས་མཆོད་མེ་ཕུལ་དགོས་པའི་རྒྱུ་མཚན་ལྟེ་བ་གཅིག་དང་དོན་ཆེན་གཉིས་ཡིན།

ཟླ་༡ཚེས་༢༠ ཉིན་གུས་པས་ཨ་རིའི་ཝི་ཨོ་ཨེ་བོད་སྐད་ཀྱི་ཀུན་གླེང་བརྙན་འཕྲིན་ལས་རིམ་ཐོག་བར་སྐབས་བོད་ནང་གི་གནས་ཚུལ་ཐོག་གླེང་མོལ་ཞུ་ཆེད་བཅར་བ་ཡིན །
གུས་པས་བོད་ནང་བོད་མི་ཚོས་རང་ལུས་མེར་བསྲེགས་གནང་དགོས་པའི་པའི་རྒྱུ་མཚན་”ལྟེ་བ་གཅིག་དང་དོན་ཆེན་གཉིས་”ཡོད་རེད་ཞུས་པ་ཡིན།
ལྟེ་བ་གཅིག་ནི་འདས་པའི་ལོ་༦༠ལྷག་རིང་རྒྱ་ནག་ནས་བོད་ས་ཁུལ་ཐོག་དབང་སྒྱུར་བྱས་པ་དང་། དེའི་རིང་གི་སྲིད་བྱུས་ལག་བསྟར་བྱས་པ་དེ་རེད། རྒྱ་ནག་གཞུང་ནས་དབང་སྒྱུར་དེ་ནི་བཅིངས་འགྲོལ་ཡིན་གསུངས་ཀྱི་ཡོད་རུང་དོན་དངོས་ཐོག་བོད་མིར་སྔར་ཡོད་རང་དབང་དེའང་མེད་དུ་འགྱུར་བས་དེ་ནི་བཅིངས་འགྲོལ་དང་མ་མཐུན་པ་ཞིག་ཆགས་ཡོད།
དོན་ཆེན་གཉིས་ཡོད་པ་ནི་དེ་མ་ཐག་པའི་རྒྱུ་མཚན་རེད་ཞུ་ན་སྒྲིག་གང་ཡིན་ཞུ་ན་དེ་རྣམས་ཉེ་བའི་ལོ་འགའ་ཞིག་ནང་དངོས་གསལ་ནས་བྱུང་བ་དེ་ཡིན། དེའི་དོན་ཆེན་དང་པོ་ནི་༢༠༠༨ལོར་བོད་ཡོངས་ཀྱི་མངས་ཚོགས་ནས་སྒེར་ལངས་གནང་བ་དེར་རྒྱ་ནག་གཞུང་ནས་ཡ་ལན་དྲག་པོའི་ཐོག་ནས་གནང་བ་མ་ཟད། བོད་མི་དང་རྒྱ་མི་རིགས་དབར་འགལ་ཟླ་བཟོ་བའི་སྲིད་བྱུས་ལག་ལེན་བསྟར་བ་དེ་ཡིན། བོད་མིའི་སེམས་ནང་རང་ཉིད་ཀྱི་བདེ་སྡུག་ལ་རྒྱ་ནག་གཞུང་ནས་གསན་ཤེས་གནང་གི་མེད་པའི་ཚོར་བ་དེ་ཤུགས་ཆེ་རུ་ཕྱིན་པ་རེད།
དོན་ཆེན་གཉིས་པ་དེ་ནི་བོད་མིར་རང་གི་ཆོས་དང་། རིག་གཞུང་། ཉིན་རེའི་བྱེད་སྒོ་ལ་སོགས་པའང་ལོངས་སུ་སྤྱོད་རྒྱུའི་གོ་སྐབས་ཉིན་རེ་ནས་ཉིན་རེ་ཉུང་དུ་ཕྱིན་ནས་ད་ཆ་མེད་པ་ལྟ་བུ་ཆགས་པའི་ཁོར་ཡུག་དེ་རེད། དེ་རྐྱེན་རྒྱ་ནག་གཞུང་གིས་བོད་མིའི་བྱ་སྤྱོད་ཐ་དག་”ཆབ་སྲིད་”ཡིན་པར་ངོས་འཛིན་བྱས་པའི་ཁོར་ཡུག་འོག་བོད་མིར་བདེ་སྡུག་ཞུ་ས་ཕར་བཞག་དེ་ཐོག་གླེང་མོལ་གནང་རྒྱུའི་གོ་སྐབས་གང་ཡང་མེད་པ་ཆགས་པ་རེད།
བོད་ནང་བོད་མི་ཚོའི་ལུས་ཀྱི་མཆོད་མེ་དེ་ཚོའི་བརྡ་ལན་ག་རེ་ཡོད་དམ་ཞུ་ན་གུས་པའི་བསམ་པར་བརྡ་ལན་ཁག་གསུམ་ཙམ་ཡོད་རེད་བསམ།
བརྡ་ལན་དང་པོ་དེ་ནི་བོད་པའི་ལས་འགུལ་དེ་ད་ཆ་མི་རབས་གསར་པས་འགོ་ཁྲིད་གནང་གི་ཡོད་པ་དེ་གསལ་པོ་ཆགས་པ་རེད། སྐུ་ལུས་མཆོད་མི་འབུལ་གནང་མཁན་རྣམས་༡༩༦༤རྗེས་འཁྲུངས་པ་དང་། ཁོང་རྣམས་རྒྱ་ནག་དམར་པོའི་སྤྱི་ཚོགས་འོག་ཚར་ལོང་བྱུང་བ་ཤ་སྟག་རེད། དེས་ད་ཡོད་རྒྱ་ནག་གི་བོད་མིའི་ཐོག་སྲིད་བྱུས་དེའི་ཕན་ཡོན་གང་འདྲ་བྱུང་ཡོད་པ་དེ་མཚོན།

བརྡ་ལན་གཉིས་པ་ནི་བྱུང་རིམ་འདིས་བོད་ནང་གི་དངོས་ཡོད་གསར་པ་དེ་སྟོན་པ་རེད་། བོད་ནང་བོད་མི་ཚོར་འཛམ་གླིང་གི་གནས་ཚུལ་ཆ་ཚང་མཁྱེན་ཐུབ་རྒྱུ་མེད་རུང་རྒྱ་ནག་ནང་གི་སྤྱི་ཚོཌ་སྐོར་མཁྱེན་གྱི་ཡོད་སྟབས་བོད་མི་ཚོར་མི་རིགས་དབྱེ་འབྱེད་ཀྱི་སྲིད་བྱུས་ལག་བསྟར་བྱེད་བཞིན་པ་དེ་ཉིན་ལྟར་ཚོར་གྱི་ཡོད་པ་རེད།
བརྡ་ལན་གསུམ་པ་དེ་ནི་རྒྱ་ནག་གཞུང་ནས་བོད་ཐོག་རང་ཉིད་ནས་བདེན་པ་མིན་པའི་དྲིལ་བསྒྲགས་དེར་མགོ་འཁོར་བ་སྟོན་པ་དེ་རེད། འདི་ཐོག་རྒྱ་ནག་དབུས་དང་ས་གནས་ཁག་ཏུ་ཡོད་པའི་བོད་རིགས་ལས་བྱེད་ཚོས་ཀྱང་བདེན་པ་མིན་པའི་སྙན་ཞུ་ཕུལ་བའི་རྐྱེན་གྱི་གནས་སྟངས་དེ་འདྲ་ཆགས་པ་རེད་བསམ།

གང་ལྟར་བོད་ནང་བྱུང་བའི་གནས་ཚུལ་དེས་རྒྱ་ནག་གཞུང་། རྒྱལ་སྤྱིའི་གཞུང་དང་མི་མང་རྣམས་ཀྱི་བློ་ཡུལ་ལ་མེད་པ་ཞིག་ཡིན་ཞིང་། དེར་བརྟེན་འཛམ་གླིང་གི་གཞུང་ཁག་ནས་བྱུང་རིམ་འདི་དང་འབྲེལ་བའི་ཐོག་དགོངས་པ་བཞེས་ཕྱོགས་ཐོག་བཀའ་བསྡུར་གནང་བཞིན་རེད། དེ་བཞིན་རྒྱ་ནག་གཞུང་གི་འབྲེལ་ཡོད་ལས་བྱེད་ནས་དོན་གནད་འདི་ཐོག་བཀའ་བསྡུར་ལྷུག་པོ་གནང་གི་ཡོད་པ་ནི་བརྗོད་མི་དགོས་པ་རེད། གུས་པའི་རེ་བར་རྒྱ་ནག་གཞུང་ནས་དཀའ་རྙོག་སེལ་ཆེད་དྲག་པོའི་ཐབས་ལམ་ཞིག་བསྐྱར་དུ་བེད་སྤྱོད་མི་གནང་བ་དེ་ཡིན།
སེམས་ཤུགས་བསྐྱེད་དགོས་པ་ཞིག་ལ་རྒྱ་ནག་ནང་ཨ་ནི་ཞིག་དང་། མཁས་དབང་ཝང་ལི་ཤོང་སོགས་ནས་བོད་མིས་རང་ལུས་མཆོད་མེ་ཕུལ་བའི་སྐོར་རྩོམ་བྲིས་གནང་བ་དང་། དེ་བཞིན་རྒྱ་སྐད་དྲ་ཚིགས་སོགས་ནང་གནད་དོན་དེར་གྲོས་བསྡུར་ལྷུག་པོ་ཡོང་བཞིན་པ་དེ་ཡིན། དེས་རྒྱ་ནག་སྤྱི་ཚོགས་ནང་བོད་དོན་ཐོག་བགྲོ་གླེང་ལེགས་པའི་རང་བཞིན་དུ་འགྲོ་རྒྱུར་ཕན་ཐོག་ཡོད།

ཉེ་ཆར་བོད་ཤར་ཕྱོགས་སུ་བྱུང་བའི་གནས་ཚུལ་དང་འབྲེལ་བའི་ཐོག་གུས་པའི་ཚོར་སྣང་།

བར་སྐབས་བོད་ཤར་ཕྱོགས་ནང་བོད་མི་ཚོས་༧གོང་ས་མཆོག་དང་བོད་པའི་སྤྱི་དོན་ཆེད་སྐུ་ལུས་ཀྱི་མཆོད་མེ་འབུལ་བཞིན་པ་དེའི་གཏིང་ཟབ་པའི་གོ་དོན་ང་ཚོས་རྟོགས་དགོས་རྒྱུ་གལ་ཆེན་པོ་ཡིན། དེ་ཞུ་དགོས་དོན་ནི་ཉེ་ཆར་བཞུགས་སྒར་ནས་བརྙན་འཕྲིན་ཞིག་ཐོག་བོད་མི་གཞོན་སྐྱེས་འགའ་ཞིག་གི་དེ་སྐོར་དགོངས་འཚུལ་གསུངས་པ་ཞིག་མཐོང་བྱུང་བས་གནད་དོན་དེར་ཐུགས་སྣང་ཡག་པོ་བྱུང་མེད་པའི་ཚོར་བ་བྱུང་།

ངའི་བསམ་པར་བར་སྐབས་བོད་ནང་བྱུང་བའི་གནད་དོན་དང་དེ་ཐོག་བཙན་བྱོལ་དུ་ཡོད་པའི་བོད་མི་ཚོས་བྱ་བ་སྤེལ་བ་སོགས་ཀྱིས་ཤུགས་རྐྱེན་ཁག་གསུམ་ཐེབས་འདུག་

དང་པོ་དེར་དེས་བོད་ཕྱི་ནང་གཉིས་སུ་ཡོད་པའི་བོད་མི་ཚོའི་སྐྱིད་སྡུག་མཉམ་མྱོང་ཡིན་པའི་གནས་སྟངས་དེ་ཤུགས་ཆེ་རུ་བཟོ་འདུག  བོད་ནང་གནས་ཚུལ་བྱུང་རྗེས་ཕྱིར་བསྡོད་བོད་མི་ཚོའི་ནང་སེམས་འགུལ་ཆེན་པོ་ཐེབས་ཡོད་པ་ནི་ང་ཚོའི་ས་ཁུལ་གྱི་བོད་མི་ཚོའི་ཐུགས་ཚོར་ནས་མཐོང་ཐུབ་ཀྱི་འདུག་ ཕལ་ཆེར་༢༠༠༨ལོར་བོད་ཡོངས་སུ་རྔམ་སྟོན་བྱུང་རྗེས་ཀྱི་ཚོར་བ་དང་འདྲ་པོ་འདུག་བསམ།

ཤུགས་རྐྱེན་གཉིས་པ་ནི་རྒྱལ་སྤྱིའི་སྤྱི་ཚོགས་ལ་བོད་དོན་ལས་འགུལ་དེའི་ཁ་ཕྱོགས་གཞན་ཞིག་ཏུ་འགྲོ་སྲིད་པའི་གནད་དོན་དེ་བསམ་ཚུལ་ཙམ་མིན་པར་དངོས་སུ་ཡོང་སྲིད་པ་དེ་སྟོན་པ་རེད། འཛམ་གླིང་གི་གཞུང་ཁག་ནས་བོད་ནང་བྱུང་བཞིན་པའི་གནས་ཚུལ་ཐོག་ཐུགས་སྣང་ཆེན་པོ་བྱེད་བཞིན་ཡོད་པ་དེ་འབྲེལ་ཡོད་མི་སྣ་ཚོས་བརྗོད་ཀྱི་འདུག

ཤུགས་རྐྱེན་གསུམ་པ་ནི་རྒྱ་ནག་གཞུང་ལ་བོད་ཀྱི་དཀའ་རྙོག་དེ་དྲག་རྩུབ་ཐོག་སེལ་རྒྱུའི་ཐབས་ལམ་དེ་འགྲིག་གི་མེད་པའི་དྲན་གསོ་ཆེན་པོ་ཞིག་རེད།

རྒྱ་ནག་གཞུང་གི་འགན་འཁུར་བ་འགའ་ཞིག་ནས་བོད་ནང་བོད་མི་ཚོའི་དཔལ་འབྱོར་གནས་སྟངས་ཡར་རྒྱས་བཏང་བ་ཡིན་ན་འགྲིག་གི་ཡོད་བསམ་གྱི་ཡོད་རུང་དོན་དངོས་ཐོག་དེས་བོད་མིའི་འདོད་དོན་དེ་གསལ་པོ་རྟོགས་མེད་པ་དེ་དེང་གི་གནས་ཚུལ་ནས་སྟོན་ཡོད།

གནས་སྟངས་ཛ་དྲག་པོ་ཡིན་པའི་རྟགས་གཅིག་ནི་རྒྱ་ནག་ནང་ཡོད་པའི་མང་ཚོགས་དང་ལྷག་པར་རྒྱ་རིགས་ལས་བྱེད་འགའ་ཞིག་ནས་ཉེ་ཆར་རྔ་པ་ཁུལ་དུ་བྱུང་བའི་གནས་ཚུལ་དེ་ཚོར་ཐུགས་ཚབ་དང་དེའི་འབྱུང་རྐྱེན་གང་ཡིན་མིན་ཐོག་བཀའ་མོལ་ཡོང་གི་ཡོད་པའི་གནས་ཚུལ་འདུག

གང་ལྟར་བོད་ནང་བཞུགས་མཁན་ཚོས་དགོངས་པ་གཏིང་ཟབ་ཀྱིས་ལས་འགུལ་དེ་འདྲ་སྤེལ་བའི་དུས་འདིར་ཕྱིར་ཡོད་བོད་མི་ཚོས་ཐོག་མར་གནས་ཚུལ་དེ་ལེགས་པོ་མཁྱེན་ཐུབ་ཐབས་གནང་རྒྱུ་དང་། དེ་ནས་ལས་འགུལ་གང་སྤེལ་རུང་ཕྲལ་སེལ་ཆབ་སྲིད་ཀྱི་དགོས་འཁོའི་ཆེད་དམ་ཡང་ན་རང་གི་ཆབ་སྲིད་ལངས་ཕྱོགས་ཆེད་མིན་པར་ཕུག་རྒྱང་རིང་པོའི་གནས་ཚུལ་ལ་གཟིགས་ནས་གནང་དགོས་ཡོད།

བོད་མིའི་བཅའ་ཁྲིམས་བསྐྱར་བཅོས་སྐོར་གུས་པའི་བསམ་ཚུལ།

ཉེ་ཆར་གུས་རང་བཞུགས་སྒར་དུ་བསྐྱོད་སྐབས་བོད་ཀྱི་དུས་བབ་རྩོམ་སྒྲིག་པ་དོན་གྲུབ་བཀྲིས་ལགས་ནས་བཅར་འདྲི་གནང་བྱུང་བས་དེ་ཚགས་པར་གྱི་དྲ་ཚིགས་སུ་བཀོད་འདུག གཤམ་དུ་དེའི་ངོ་བཤུས་ཡོད།

ཐ་སྙད་གནད་འགག་ཆུང་བ་དང་དོན་དག་གནད་འགག་ཆེ་བ་རེད།
འདོན་སྤེལ། ༢༠༡༡/༠༦/༡༠

ཉེ་ལམ་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པའི་སྟེང་། བཙན་བྱོལ་བོད་མིའི་བཅའ་ཁྲིམས་ནང་གི་༧གོང་ས་མཆོག་གི་སྐུ་དབང་དང་འབྲེལ་བའི་གནད་དོན་ཁག་ལ་བསྐྱར་བཅོས་བཏང་ཞིང་། བཙན་བྱོལ་བོད་གཞུང་གི་མཚན་བྱང་ཕྱིར་བསྡུ་གནང་བ་བཅས་ལ་བརྟེན་ཏེ། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བུ་ཆུང་ཚེ་རིང་ལགས་སུ་བཅར་འདྲི་ཞུས་ཡོད།

དྲི་བ། ༧གོང་ས་མཆོག་གིས་བོད་མིའི་ཆབ་སྲིད་དང་འཛིན་སྐྱོང་གཉིས་ཐད་ནས་དགོངས་པ་ཞུས་པའི་ཐད་གཟིགས་ཚུལ་གང་འདྲ་ཡོད་དམ།
ལན། ༧རྒྱལ་བ་རིན་པོ་ཆེ་མཆོག་གིས་ད་ལོའི་ཕྱི་ཟླ་ ༣ པའི་ནང་གཞུང་འབྲེལ་ཐོག་ནས་བཀའ་གནང་བ་དེ་ནི། དགོངས་པ་ཆེན་པོ་བཞེས་ཏེ་ད་ལྟའི་བོད་མིའི་གནས་སྟངས་དང་། འབྱུང་འགྱུར་སོགས་གཞིར་རྩར་བཞག་སྟེ་གོམ་པ་མདུན་སྤོ་བྱས་པ་ཞིག་ལ་ངོས་འཛིན་བྱེད་ཀྱི་ཡོད། ང་ཚོ་བོད་མི་ཡིན་པའི་ཆ་ནས་རྒྱལ་བ་རིན་པོ་ཆེས་བཀའ་མ་འདྲ་བ་ཞིག་གནང་ཡོང་སྐབས་སེམས་འཚབ་ཡོང་གི་ཡོད་པ་ཆོས་ཉིད་རེད། འོན་ཀྱང་། དེ་ནི་སྡུག་ཕྱོགས་མིན་པ་ཧ་གོ་དགོས་པ་རེད། སྤྱི་ཚོགས་ནང་སྡུག་ཕྱོགས་ལ་ངོས་འཛིན་བྱེད་མཁན་དང་། ༧རྒྱལ་བ་རིན་པོ་ཆེས་མི་དམངས་བློས་བཏང་བ་རེད་ཟེར་བའི་སྐད་ཆ་ཡོང་གི་འདུག འོན་ཀྱང་དོན་དངོས་ཐོག་དེ་འདྲ་ཞིག་རྩ་བ་ནས་མ་རེད། ཐེངས་འདིའི་༧རྒྱལ་བ་རིན་པོ་ཆེས་གནང་སྟངས་དེ་བཟང་ཕྱོགས་ཀྱི་འགྱུར་བ་ཆེན་པོ་ཞིག་རེད། ༧རྒྱལ་བ་རིན་པོ་ཆེ་ཡིས་མི་དམངས་ལ་ཡིད་ཆེས་གནང་གི་ཡོད་པ་རེད། ཡིག་ཆ་གང་འདྲ་ཞིག་བཟོས་པ་དང་། མིང་གང་འདྲ་ཞིག་བཏགས་ཀྱང་། ལོ་རྒྱུས་ཐོག་གི་༧གོང་ས་སྐུ་ཕྲེང་ན་རིམ་གྱི་བླ་བྲང་དང་། བོད་མིའི་བར་གྱི་འབྲེལ་བ་དེ་ལ་འགྱུར་བ་འགྲོ་མི་སྲིད་པ་ཞིག་རེད། བོད་ནང་གི་བོད་མི་དང་༧གོང་ས་མཆོག་གི་འབྲེལ་བ་དེ་བཅའ་ཁྲིམས་ཀྱིས་བཟོ་དགོས་པ་ཞིག་མ་རེད། བཅའ་ཁྲིམས་མེད་པའི་སྔ་རོལ་ནས་ཡོད་བསྡད་པ་ཞིག་རེད། འདི་ཤེས་དགོས་པ་གནད་འགག་ཆེ་པོ་རེད།

དྲི་བ། བཅའ་ཁྲིམས་བསྐྱར་བཅོས་ནང་དུ་ཡང་བསྐྱར་༧གོང་ས་མཆོག་ལ་འགན་དབང་གང་འཚམ་ཞིག་ཕུལ་ཡོད་པའི་ཐད་དགོངས་ཚུལ་གང་འདྲ་ཡོད་དམ།
ལན། རྩ་བའི་ང་རང་ཐེངས་འདིའི་ཚོགས་ཆེན་ལ་བཅར་རྒྱུ་མ་བྱུང་སྟབས་ཞིབ་ཚགས་ཤེས་ཀྱི་མེད། ང་རང་གི་ལངས་ཕྱོགས་གང་ཡིན་ཟེར་ན། ༧གོང་ས་མཆོག་དང་བོད་མིའི་བར་གྱི་དམིགས་བསལ་འབྲེལ་བ་དེ་བཅའ་ཁྲིམས་ནང་གསལ་དགོས་པ་ཞིག་དང་། ༧གོང་ས་མཆོག་གིས་སྔོན་མ་གྲོས་ཚོགས་ལ་གསུང་འཕྲིན་ཕེབས་པའི་ནང་། བོད་ཀྱི་རྩ་དོན་ཐོག་ངས་མུ་མཐུད་འགན་འཁྱེར་རྒྱུ་ཡིན་གསུངས་པ་དེ་མེད་དུ་མི་རུང་བ་ཞིག་རེད། དེ་མིན། ནུབ་ཕྱོགས་ཁག་གི་འགྲོ་སྟངས་དེ་འདྲ་ང་ཚོའི་སྤྱི་ཚོགས་ནང་འཁྱེར་ཡོང་བ་ཡིན་ན་འགྲིག་གི་མ་རེད། གལ་སྲིད་དེ་འདྲ་ཡོད་ན་མུ་མཐུད་དགོངས་པ་གཏིང་ཟབ་བཞེས་དགོས་པ་རེད། ང་ཚོའི་གནས་བབ་དམིགས་བསལ་ཞིག་ཡིན་པ་དེ་དམིགས་བསལ་རང་གི་ཐོག་ནས་བཞག་ན་གཟི་བརྗིད་ཆེན་པོ་རེད།

དྲི་བ། རྒྱལ་ཡོངས་ཚོགས་ཆེན་དང་གྲོས་ཚོགས་འཕར་མ་བཅས་ཀྱི་སྟེང་བཙན་བྱོལ་བོད་གཞུང་གི་མིང་དེ་ཕྱིར་བསྡུ་བྱས་པ་དེར་ངོས་འཛིན་གང་འདྲ་ཡོད་དམ།
ལན། དེ་ནི་ང་ཚོས་ཆབ་སྲིད་ཀྱི་སྲིད་བྱུས་གང་འདྲ་ཞིག་གཏན་འབེབས་བྱ་མིན་ལ་རག་ལས་ཡོད་པ་རེད། སྤྱིར་བཏང་བོད་གཞུང་ཟེར་བ་དེ་ཚིག་ལྗིད་ཁོག་ཆེན་པོ་ཞེ་དྲག་རེད། དེ་ལ་མཚོན་རྟགས་དང་ལོ་རྒྱུས་རྒྱབ་ལྗོངས་ངེས་ཅན་ཡོད་པ་རེད། འོན་ཀྱང་ད་ལྟའི་ཆར་མཛད་གཙོ་རྣམ་པས་དགོས་མཁོའི་དབང་གིས་མིང་དེ་ལ་འགྱུར་བ་གཏོང་དགོས་པ་ཡིན་ན། གཞུང་ཟེར་བའི་ཚིག་དེ་ཐ་སྙད་ཙམ་རེད། ཐ་སྙད་དེར་ལྗིད་ཁོག་ག་ཚོད་ཅིག་ཤོང་མིན་མི་དམངས་ལ་རག་ལས་ཡོད་པ་རེད། བོད་གཞུང་ཟེར་བ་དེ་སྔོན་མ་ལྷ་ས་སྡེ་བ་གཞུང་གི་ཁྱབ་ཁོངས་ཙམ་རེད། ཨ་མདོ་ཁུལ་དང་ཁམས་ཀྱི་ས་ཆ་མང་པོ་ཞིག་བོད་གཞུང་གི་འོག་ཏུ་ཁྱབ་ཀྱི་ཡོད་པ་མ་རེད། འོན་ཀྱང་བོད་མི་ཡོངས་ཀྱིས་སྡེ་བ་གཞུང་དང་འབྲེལ་བ་གང་འདྲ་ཡོད་མེད་ལ་མ་ལྟོས་པར་༧རྒྱལ་བ་རིན་པོ་ཆེ་རྩ་བའི་བླ་མ་ཡིན་པ་དང་བོད་མི་སྤྱིའི་དབུ་འཁྲིད་ཡིན་པར་ངོས་འཛིན་གནང་གི་ཡོད་པ་རེད། དེའི་རྐྱེན་གྱིས་ང་དགུའི་རྗེས་ལ་ཡང་མདོ་དབུས་ཁམས་གསུམ་གྱི་བོད་མི་ཡོངས་ཀྱིས་རྒྱལ་བ་རིན་པོ་ཆེས་དབུ་ཁྲིད་པའི་བཙན་བྱོལ་བོད་གཞུང་འདི་ལ་བརྩི་བཀུར་ཞུ་བཞིན་ཡོད་པ་རེད། བཙན་བྱོལ་བོད་གཞུང་ཞེས་པའི་ཐ་སྙད་ཙམ་ལ་འགྱུར་བ་གང་འདྲ་ཞིག་བཏང་ཡང་། ང་ཚོས་ཞབས་ཞུ་སྒྲུབ་ས་དང་བརྩི་བཀུར་ཞུ་ས་གཙོ་བོ་དེ་སྒྲིག་འཛུགས་འདི་རེད་བསམ་གྱི་ཡོད། མིང་ཆེན་པོ་ཞིག་བཏགས་ཏེ་དོན་དག་ངོ་མའི་ཐོག་ལ་ཕན་ཐོགས་ཀྱི་མེད་པ་མ་ཟད། རྒྱལ་ཁབ་གཞན་མང་པོ་ཞིག་གིས་ང་ཚོར་འབྲེལ་བ་བྱ་རྒྱུར་འགོག་རྐྱེན་ཆགས་ཀྱི་ཡོད་ན། ང་ཚོས་ང་ཚོའི་ལག་པ་བསྡམ་གྱི་ཡོད་པ་ཤེས་དགོས་པ་རེད། ང་ཚོས་དོན་དག་གནད་འགག་ཆེ་བ་དང་ཐ་སྙད་གནད་འགག་ཆུང་བར་བརྩི་དགོས་པ་རེད། དོན་དག་དེ་བསྒྲུབ་པའི་ཆེད་དུ་ཐ་སྙད་བརྗེ་བོ་རྒྱག་དགོས་ཀྱི་ཡོད་ན་ཐེ་ཚོམ་བྱ་རྒྱུ་ཡོད་པ་མ་རེད།

དྲི་བ། སྤྱི་ཚོགས་ནང་བཙན་བྱོལ་བོད་མིའི་བཅའ་ཁྲིམས་ལ་བསྐྱར་བཅོས་ཆེན་པོ་གཏོང་རྒྱུར་བཀའ་སྤྱི་གཉིས་ཀྱི་ལས་འགན་ཙམ་མིན་པར། ཤེས་ལྡན་མི་སྣ་དང་ཁྲིམས་ལུགས་ཆེད་མཁས་པས་བསྒྲུབ་དགོས་པ་ཞིག་ཡིན་སྐོར་རྗོད་མཁན་ཡོད་པའི་ཐད་དགོངས་ཚུལ་གང་འདྲ་ཡོད་དམ།
ལན། བཙན་བྱོལ་བོད་མའི་སྒྲིག་འཛུགས་དེ་རང་དབང་ཅན་གྱི་སྒྲིག་འཛུགས་ཤིག་མིན་པ་དེ་ཚང་མས་མཁྱེན་གྱི་ཡོད་པ་རེད། དམིགས་བསལ་གྱི་སྒྲིག་འཛུགས་ཤིག་ཆགས་ཡོད། རྒྱ་གར་གཞུང་དང་། དེ་མིན་བོད་མི་སྐྱབས་བཅོལ་བ་གནས་ཡུལ་གྱི་གཞུང་ཁག་གི་འོག་ཏུ་ཕྱག་ལས་གནང་དགོས་ཀྱི་ཡོད་པ་རེད། གཞུང་གཞན་པའི་དམིགས་ཡུལ་དང་ལས་དོན་གཙོ་བོ་འཛིན་སྐྱོང་རེད། ང་ཚོའི་གཞུང་འདིས་ཆབ་སྲིད་ཀྱི་དམིགས་ཡུལ་ཞིག་བཟུང་སྟེ་ལས་འགུལ་རང་བཞིན་གྱི་གཞུང་ཞིག་རེད། ལས་དོན་དེ་བསྒྲུབ་པར་ཐབས་ལམ་ཡག་ཤོས་གང་ཞིག་ཡོད་ན་དེ་གཙོ་བོར་འཛིན་དགོས་པ་རེད། བཅའ་ཁྲིམས་བསྐྱར་བཅོས་གནང་མཁན་སུ་ཡིན་དང་། བསྐྱར་བཅོས་ནང་གི་མིང་ཚིག་ལ་འགྱུར་བ་གང་འདྲ་གཏོང་མིན་དེ་གཙོ་བོ་མ་རེད། རྒྱ་བལ་འབྲུག་གསུམ་གྱི་བོད་པ་སྐྱབས་བཅོལ་བ་ཚོ་གང་འཚམ་འགྲིག་བསྡད་ཡོད་ཀྱང་། ནུབ་ཕྱོགས་རྒྱལ་ཁབ་ཁག་ཏུ་ཉིན་རེ་བཞིན་བོད་པ་མང་དུ་འགྲོ་བཞིན་ཡོད་ཀྱང་བོད་པའི་ངོ་བོར་འགྱུར་བ་འགྲོ་བཞིན་ཡོད། གནས་ཡུལ་རྒྱལ་ཁབ་ཀྱི་མི་སེར་ཆགས་བཞིན་ཡོད། ཁོང་ཚོ་དམིགས་བསལ་གྱི་ངོ་བོ་ཞིག་གི་འོག་ཏུ་ཡོད། དམིགས་བསལ་ངོ་བོ་དེ་ལ་ང་ཚོའི་སྒྲིག་འཛུགས་འདིས་དགོངས་པ་བཞེས་ཐུབ་པ་ཞིག་བཟོ་རྒྱུ་ཧ་ཅང་གལ་གནད་ཆེན་པོ་རེད། ངོ་བོ་གསར་པ་དེ་ལ་ནུས་པ་གསར་པ་ཞིག་ཡོད་པ་རེད། ཨ་རིའི་མི་སེར་ཞིག་དང་ཨ་རིའི་མི་སེར་ཡིན་པའི་བོད་པ་སྐྱབས་བཅོལ་བ་ཞིག་གི་ནུས་པ་ཁ་ཁ་ཡིན། ཇེའུ་མི་རིགས་ཀྱི་རྒྱལ་ཁའི་འབྱུང་ཁུངས་ཡང་དེ་རེད། སྐབས་དེར་རྒྱལ་ཁབ་འདྲ་མིན་ནང་ཡོད་པའི་ཇེའུ་མི་རིགས་ཚང་མ་སྐྱབས་བཅོལ་བ་མ་རེད། རྒྱལ་ཁབ་དེ་དག་གི་མི་སེར་ཆགས་བསྡད་ཡོད་ཀྱང་། མི་རིགས་ཀྱི་ངོ་བོ་དང་དམིགས་ཡུལ་བརླག་ཡོད་པ་མ་རེད། འོན་ཀྱང་ང་ཚོའི་སྒྲིག་འཛུགས་འདིས་གང་འདྲ་ཞིག་ལ་དགོངས་པ་བཞེས་ཀྱི་ཡོད་པ་དང་། ག་ཚོད་ཅིག་རྟོགས་ཐུབ་ཀྱི་ཡོད་མེད་ངས་བཤད་ཐུབ་ཀྱི་མི་འདུག

དྲི་བ། ༧གོང་ས་མཆོག་གིས་བོད་མིའི་ཆབ་སྲིད་ཀྱི་ཐུགས་འགན་མ་བཞེས་པ་དང་། བོད་གཞུང་དགའ་ལྡན་པོ་བྲང་སྒོ་བརྒྱབ་པ། བཙན་བྱོལ་བོད་གཞུང་གི་མིང་བརྗེ་བསྒྱུར་བྱས་པ་བཅས་ཀྱིས་བོད་མིའི་ཁྲིམས་མཐུན་གཞུང་གི་ངོ་བོར་དོ་ཕོག་འགྲོ་སྲིད་དམ།
ལན། སྤྱིར་རྒྱལ་སྤྱིའི་ཁྲིམས་ཐོག་ནས་ང་ཚོའི་གཞུང་འདི་ལ་ངོས་ལེན་ཡོད་པ་མ་རེད། འོན་ཀྱང་སྔ་མོའི་བག་ཆགས་ཙམ་ཡོད་དམ་ཟེར་ན། འདི་ལ་ལྟ་ཕྱོགས་གཉིས་ཡོད་པ་རེད། ཕྱོགས་གཅིག་ནས་ཡོད་པ་མ་རེད་ལབ་སྲིད་པ་རེད། གང་ཡིན་ཟེར་ན། དེ་སྔ་ལྷ་སར་ཡོད་པ་དེ་དགའ་ལྡན་ཕོ་བྲང་གཞུང་རེད། ད་ཆར་དེ་སྒོ་བརྒྱབ་ཚར་བ་ཡིན་ན་ལོགས་སུ་གཞུང་ཞིག་ལྷག་གི་ཡོད་པ་མ་རེད། འོན་ཀྱང་། ༧རྒྱལ་བ་རིན་པོ་ཆེ་རང་གི་ཞལ་ནས་བཀའ་གནང་སྟེ་བསྒྱུར་བཅོས་བཏང་བ་ཡིན་ན། དེ་ལ་དམིགས་བསལ་གྱི་ལམ་ཁ་ཞིག་ཡོད་རྒྱུ་རེད། གཙོ་བོ་གཞུང་གསར་པ་འདི་ལ་༧རྒྱལ་བ་རིན་པོ་ཆེ་ཡིས་ངོས་ལེན་ཡོད་པ་རེད་དམ་མ་རེད། གལ་སྲིད་ཡོད་ན། ཁྲིམས་ཐོག་ནས་ཀྱང་དེ་ལས་ལྷག་ཅིག་དཔུང་པོར་འཇོག་རྒྱུ་ཡོད་པ་མ་རེད། གཞན། བོད་མི་སོ་སོའི་ལུང་པའི་ནང་སྡོད་མ་ཐུབ་པར་ཕྱི་རྒྱལ་ལུང་པར་སྐྱབས་བཅོལ་དུ་ཡོང་གི་ཡོད་པའི་དྲང་བདེན་མ་ཡིན་པའི་གནས་ཚུལ་དེ་ལ་རྒྱབ་སྐྱོར་བྱེད་ཀྱི་ཡོད་པ་རེད། དེ་བཞིན། ཤེས་ཡོན་ཐོག་རྒྱབ་སྐྱོར་བྱེད་མཁན་དང་། ཁོར་ཡུག་ཐོག་རྒྱབ་སྐྱོར་བྱེད་མཁན། འཕྲོད་བསྟེན་ཐོག་རྒྱབ་སྐྱོར་བྱེད་མཁན། བུད་མེད་དང་བྱིས་པའི་ཐོབ་ཐང་ཐོག་རྒྱབ་སྐྱོར་བྱེད་སོགས་ཁོང་ཅག་གིས་ལས་འགན་ཞིག་གི་ངོ་བོའི་ཐོག་ནས་རྒྱབ་སྐྱོར་བྱེད་ཀྱི་ཡོད་པ་རེད།

དྲི་བ། ༧གོང་ས་མཆོག་གིས་ཆབ་སྲིད་ཀྱི་ཐུགས་འགན་མཚམས་འཇོག་བྱེད་ཀྱི་ཡོད་པའི་སྐབས་འདིར། བོད་དབུས་མིའི་སྒྲིག་འཛུགས་དང་གཞི་རིམ་མང་ཚོགས་ཀྱི་ངོས་ནས་གྲ་སྒྲིག་བྱ་དགོས་པ་དེ་འདྲ་མཐོང་གི་ཡོད་དམ།
ལན། ཐེངས་འདིའི་འགྱུར་བ་ཆེ་ཤོས་དེ་བཀའ་བློན་ཁྲི་པའི་མཛད་འགན་ཐོག་ཆགས་ཡོད། དེ་ལ་ང་རང་གིས་དོན་ཚན་གསུམ་དུ་བགོས་ཡོད། དང་པོ། བཀའ་བློན་ཁྲི་པས་བཙན་བྱོལ་བོད་མི་ཙམ་མ་ཡིན་པར་བོད་མི་སྤྱིའི་དབུ་ཁྲིད་ཡིན་པའི་དགོངས་པ་བཞེས་ཐུབ་དགོས་པ་དང་། ཕྱག་ལས་གནང་ཐུབ་དགོས་པ་དེ་གནད་འགག་ཆེ་ཤོས་ཤིག་རེད། ༧རྒྱལ་བ་རིན་པོ་ཆེ་ཡིས་འགན་དབང་མར་གནང་བའི་རྒྱུ་མཚན་གཅིག་ནི། བོད་མི་སྤྱིའི་དབུ་ཁྲིད་ཅིག་འཐོན་ཐུབ་པའི་ཆེད་དུ་རེད། ད་ལྟའི་བཀའ་བློན་ཁྲི་པ་ཙམ་མ་ཡིན་པར་ཇི་སྲིད་ང་ཚོ་བཙན་བྱོལ་དུ་གནས་པ་དེ་སྲིད་དུ་བཀའ་བློན་ཁྲི་པ་དེ་འདྲ་ཞིག་དགོས་ཀྱི་ཡོད་པ་རེད། དེ་སྔའི་བཀའ་བློན་ཁྲི་པ་རྣམ་པས་དགོངས་པ་དེ་འདྲ་བཞེས་ཐུབ་ཡོད་པ་མ་རེད། ང་རང་གིས་བཙན་བྱོལ་བོད་མིའི་དབུ་ཁྲིད་དང་བོད་མིའི་དབུ་ཁྲིད་གཉིས་ལ་ཁྱད་པར་མཐོང་གི་ཡོད། གཉིས་པ། བཀའ་བློན་ཁྲི་པའི་ངོས་ནས་བོད་ནང་གི་བོད་མི་དང་ཕྱི་ལོགས་སུ་ཡོད་པའི་བོད་མིའི་བར་གྱི་འབྲེལ་ལམ་དང་། བོད་ནང་གི་བོད་མི་དང་༧རྒྱལ་བ་རིན་པོ་ཆེའི་བར་གྱི་འབྲེལ་བ་བརྟན་པོ་བཟོ་ཐབས་ལ་དགོངས་པ་བཞེས་དགོས་ཀྱི་འདུག གསུམ་པ། བོད་མིའི་སྒྲིག་འཛུགས་འདིས་དངོས་ཤུགས་བརྒྱུད་གསུམ་ནས་རྒྱལ་སྤྱིའི་སྟེང་ལ་འབྲེལ་བ་ཉར་ཐུབ་པ་དང་། དེ་སྔའི་འབྲེལ་བ་ཡར་རྒྱས་སུ་བཏང་སྟེ་ང་ཚོར་རྒྱལ་སྤྱིའི་སྟེང་གི་རྒྱབ་སྐྱོར་འཚོལ་རྒྱུ་དེ་རེད། འདི་དག་བཀའ་བློན་ཁྲི་པའི་ལས་འགན་གཙོ་བོ་དག་རེད།

གཞན། གཞོན་སྐྱེས་ཚོས་ཆབ་སྲིད་ཐོག་གཏིང་ཟབ་ས་ནས་དགོངས་པ་བཞེས་དགོས་ཀྱི་འདུག ང་ཚོའི་སྤྱི་ཚོགས་ནང་ལས་འགུལ་སྤེལ་ཕྱོགས་ལ་ལེགས་བཅོས་དང་ཡར་རྒྱས་གཏོང་དགོས་ས་མང་པོ་ཞིག་འདུག་དྲན་ཡོད། ཐོག་མར་ལས་འགུལ་གྱི་དམིགས་ཡུལ་གསལ་པོ་ངོས་ཟིན་དགོས་པ་རེད། ལས་འགུལ་སྤེལ་བ་དེ་ཉིན་གཅིག་གཉིས་རིང་ཚགས་པར་སྟེང་སྟོན་ཆེད་ཙམ་ཡིན་ན་གནས་ཚུལ་གཞན་ཞིག་རེད། ང་ཚོར་ཞེ་དྲག་ཅིག་ཡོད་མདོག་མདོག་དང་། རྒྱ་ནག་གཞུང་གི་སྐད་ཤོར་གྱི་ཡོད་ལབ་སྟེ་བསྡད་ན། ནམ་ཞིག་རྒྱ་ནག་གིས་ང་ཚོ་རྩ་མེད་བཟོ་རྒྱུ་ལས་ང་རང་ཚོས་ང་རང་ཚོ་རྩ་མེད་བཟོ་རྒྱུའི་ཉེན་ཁ་ཡོད་པ་རེད། རྔམ་སྟོན་ཁྲོམ་སྐོར་དང་ཟས་བཅད་ངོ་རྒོལ་སོགས་ཀྱིས་ཡིད་ཚིམས་ཤིང་། དེ་ནི་འགུལ་ཚད་མཐོ་ཤོས་ཡིན་བསམ་བསྡད་ན། སོ་སོས་སོ་སོར་མགོ་སྐོར་གཏོང་གི་ཡོད་པ་རེད། ལས་འགུལ་གཏིང་ཟབ་པོ་དང་ཕུགས་རྒྱང་རིང་པོ། ཁས་ལེན་དམ་བཅའ་བརྟན་པོ་ཞིག་གི་ཐོག་ནས་མཐར་འཁྱོལ་བ་ཞིག་གནང་དགོས་པ་རེད། གཞུང་གི་སྲིད་བྱུས་ལ་འགྱུར་བ་གཏོང་ཐུབ་པའི་ལས་འགུལ་དེ་འདྲ་ལ་དགོངས་པ་བཞེས་དགོས་པ་རེད། ནུབ་ཕྱོགས་རྒྱལ་ཁབ་ཁག་ཏུ་ཡོད་པའི་བོད་མི་གཞོན་སྐྱེས་ཚོས་དགོངས་པ་རྒྱ་ཆེན་པོ་དང་གཏིང་ཟབ་པོ་བཞེས་ཏེ། རྒྱལ་ཁབ་དེའི་ནང་གི་སྲིད་བྱུས་ལ་འགྱུར་གཏོང་ཐུབ་པའི་ལས་འགུལ་སྤེལ་དགོས་པ་རེད།

དྲི་བ། ༧གོང་ས་མཆོག་གི་སྐུ་དབང་ཡོངས་མི་མང་གིས་བདམས་པའི་མགོ་ཁྲིད་ཚོར་ཕུལ་བ་དང་བསྟུན་ཏེ། བཀའ་ཤག་གསར་པའི་བཀའ་བློན་ཁྲི་པར་གཞོན་སྐྱེས་ཤིག་ཕེབས་པ་འདིར་གཟིགས་ཚུལ་གང་འདྲ་ཡོད་དམ།
ལན། ད་ཆར་བཀའ་བློན་ཁྲི་པ་གསར་པ་ཕེབས་ཚར་བ་རེད། གཞོན་སྐྱེས་དང་རྒན་པའི་སྐད་ཆ་བཤད་འདོད་མི་འདུག འདི་མི་མང་གིས་འཚོ་བ་གསར་པ་ཞིག་དང་མངོན་འདོད་གསར་པ་ཞིག་གི་གྲུབ་འབྲས་རེད་བསམ་གྱི་ཡོད། འོན་ཀྱང་མི་མང་གི་མངོན་འདོད་དང་འཚོ་བ་གསར་པ་དེས་འདས་པའི་ང་ཚོའི་དབུ་ཁྲིད་རྒན་རབས་པ་དག་གི་གནང་སྟངས་ལ་འདོད་པ་མ་ཁེངས་པའི་རྣམ་པ་ཞིག་སྟོན་གྱི་ཡོད་ན། བཀའ་བློན་ཁྲི་པ་གསར་པ་འདི་ལ་འགན་མང་པོ་ཞིག་ཆགས་ཀྱི་ཡོད་པ་རེད། ཡང་གཞོན་སྐྱེས་ལ་ཡིད་ཆེས་བྱས་པའི་དབང་གིས་བཀའ་བློན་ཁྲི་པ་གསར་པ་འདི་ཕེབས་པ་ཡིན་ན། གཞོན་སྐྱེས་ཀྱི་རྣམ་དཔྱོད་འདོན་པའི་དུས་ཚོད་ཅིག་ཏུ་བསླེབས་པ་རེད། རེ་བ་དང་ལས་འགན་འདི་དག་ཏག་ཏག་ཅིག་མ་བསྒྲུབ་པ་ཡིན་ན། ང་ཚོའི་མི་མང་ལ་བློ་ཕམ་འབྱུང་བའི་གཞི་ཞིག་ཆགས་ཡོང་གི་རེད། དཔེར་ན། སྔོན་མ་གྲོས་ཚོགས་ཀྱི་གནང་སྟངས་འགྲིག་གི་མི་འདུག གྲོས་ཚོགས་ནང་གཞོན་སྐྱེས་མང་པོ་ཡོང་དགོས་ཀྱི་འདུག་ཟེར་ནས་མང་པོ་བཤད་པ་རེད། བར་སྐབས་ཤིག་ནས་གྲོས་ཚོགས་ནང་གཞོན་སྐྱེས་གང་ལ་གང་འཚམ་བསླེབས་པ་རེད། འོན་ཀྱང་། ད་ཆར་མི་མང་གིས་གྲོས་ཚོགས་ལ་ལྟ་སྟངས་ཇེ་སྡུག་ཏུ་ཕྱིན་སོང་མ་གཏོགས་ཇེ་ཡག་ཏུ་ཕྱིན་ཡོད་པ་མ་རེད། མི་མང་གི་མངོན་འདོད་དེ་རྒན་གཞོན་བར་གྱི་ཁྱད་པར་ཞིག་སྟོན་གྱི་ཡོད་ན། བཀའ་བློན་ཁྲི་པ་གསར་པ་དེར་ཐུགས་འགན་དམིགས་བསལ་ཞིག་ཆགས་ཀྱི་ཡོད་པ་རེད་བསམ་ཡོད།

དྲི་བ། ༧གོང་ས་མཆོག་གིས་བོད་མིའི་ཆབ་སྲིད་ཀྱི་ཐུགས་འགན་མ་བཞེས་པའི་རྗེས་སུ། རྒྱ་ནག་གི་ཕྱོགས་ནས་བོད་ཀྱི་གནད་དོན་ལ་ངོས་འཛིན་བྱེད་སྟངས་གང་འདྲ་འབྱུང་སྲིད་དམ།
ལན། ༧གོང་ས་མཆོག་གིས་བཀའ་དེ་གནང་བའི་རྗེས་སུ་ངས་རྩོམ་ཡིག་ཅིག་བྲིས་ཡོད། དེའི་ནང་དོན་ཚན་གསུམ་འདྲ་བཤད་ཡོད། དང་པོ། ༧གོང་ས་མཆོག་གི་བཀའ་གནང་སྟངས་དེས་རྒྱ་གཞུང་གི་འཆར་གཞི་ཆེན་པོ་ཞིག་ལ་དོ་ཕོག་ཕྱིན་པ་རེད། རྒྱ་གཞུང་གིས་༧རྒྱལ་བ་སྐུ་ཕྲེང་བཅུ་བཞི་བ་འདི་བེད་སྤྱོད་གཏོང་ཐབས་མེད་པ་སྔ་མོ་ནས་ཤེས་ཀྱི་ཡོད་ཀྱང་། སྐུ་ཕྲེང་བཅོ་ལྔ་བའི་ཐོག་ལ་སྐྱ་ཐིག་སྣ་ཚོགས་འཐེན་བཞིན་ཡོད་པ་རེད། འོན་ཀྱང་ཐེངས་འདིའི་འཕོ་འགྱུར་གྱིས་༧གོང་ས་སྐུ་ཕྲེང་བཅོ་ལྔ་བ་ཆབ་སྲིད་ཀྱི་ལག་ཆར་བེད་སྤྱོད་གཏོང་འདོད་པའི་འཆར་གཞི་དེ་འཁྲུག་སོང་བ་རེད། ༧གོང་ས་སྐུ་ཕྲེང་བཅུ་བཞི་བ་ནས་བོད་པའི་ཆབ་སྲིད་ཐོག་ཐུགས་འགན་མེད་པ་དང་། མ་འོངས་སྐུ་ཕྲེང་ན་རིམ་གྱི་འགན་དབང་གང་ཡིན་གསལ་བོ་བཟོས་ཚར་བ་རེད། བོད་ནང་གི་བོད་མི་ཚོར་གསལ་བོ་ཆགས་ཡོད་པ་རེད། གཉིས་པ། རྒྱལ་ཁབ་མང་པོ་ཞིག་གིས་༧རྒྱལ་བ་རིན་པོ་ཆེར་འབྲེལ་བ་གནང་གི་ཡོད་ཀྱང་། རྒྱལ་ཁབ་རེ་ཟུང་གིས་༧གོང་ས་མཆོག་གིས་བཙན་བྱོལ་བོད་གཞུང་གི་སྣེ་ཁྲིད་ཀྱི་ཡོད་སྟབས་འབྲེལ་བ་བྱ་རྒྱུར་འཛེམ་སོན་བྱེད་ཀྱི་ཡོད་པ་རེད། རྒྱ་ནག་གཅིག་གི་སྲིད་ཇུས་ལ་རྒྱབ་སྐྱོར་ཡོད་པའི་རྣམ་པ་སྟོན་གྱི་ཡོད་པ་རེད། ༧རྒྱལ་བ་རིན་པོ་ཆེ་ཡིས་བོད་མིའི་ཆབ་སྲིད་ཀྱི་ཐུགས་འགན་མཚམས་འཇོག་བྱས་པ་ཡིན་ན། ཁོང་ཚོས་༧རྒྱལ་བ་རིན་པོ་ཆེ་ལ་འབྲེལ་བ་བྱ་རྒྱུར་སྟབས་བདེ་བོ་ཆགས་ཡོད། ཏཱ་ལའི་བླ་མ་ཆོས་ཕྱོགས་ཀྱི་དབུ་ཁྲིད་བླ་ན་མེད་པ་ཞིག་ཡིན་པ་རྒྱལ་སྤྱིའི་ནང་ངོས་འཛིན་ཐོབ་ཡོད། དེའི་ཐད་ནས་ཤུགས་རྐྱེན་ཆེ་རུ་འགྲོ་བ་རེད། གསུམ་པ། ༧རྒྱལ་བ་རིན་པོ་ཆེས་གནང་སྟངས་དེས་རྒྱ་ནག་གཞུང་གིས་འདས་པའི་དུས་རབས་ཕྱེད་ལྷག་རིང་། གཅིག་སྡུད་དབང་འཛིན་ལམ་ལུགས་ལ་ཁ་སྐྱེངས་པོ་ཞེ་དྲག་བཟོས་པ་རེད། ཕར་ཕྱོགས་ན་ཏཱ་ལའི་བླ་མས་མི་མང་གི་ཁེ་ཕན་དོན་དུ་ལོ་རྒྱུས་ཐོག་ཡོད་པའི་སྐུ་དབང་ཡོངས་བློས་གཏོང་གི་ཡོད་པ་རེད། ཚུར་ཕྱོགས་ནས་དམར་པོའི་གཞུང་གི་བཙན་དབང་དང་དྲག་གནོན་གྱི་འོག་ནས་མི་མང་གི་རང་དབང་འཕྲོག་གི་ཡོད་པ་རེད།

གསར་འགོད་པ། དོན་འགྲུབ་བཀྲ་ཤིས།

སྲིད་འཛིན་ཨོ་སྦ་མས་བོད་སྐོར་རྒྱ་ནག་སྲིད་འཛིན་ཧུ་ཅིན་ཐའོ་མདུན་གསུངས་པའི་གོ་དོན་ག་རེ་ཡིན་ནམ།

པར་དབང་། ཕོ་བྲང་དཀར་པོ། Pete Souza

ཨ་མེ་རི་ཀའི་སྲིད་འཛིན་སྦ་རག་ཨོ་སྦ་མས་ཟླ་༡་ཚེས་༡༩ཉིན་ཕོ་བྲང་དཀར་པོའི་ནང་རྒྱ་ནག་སྲིད་འཛིན་ཧུ་ཅིན་ཐའོ་ལྷན་གསར་འགོད་ལྷན་ཚོཌ་སྐབས་བོད་སྐོར་འདི་ལྟར་གསུངས་ཡོད།

“ཨ་མི་རི་ཀས་བོད་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་ཡིན་པར་ངོས་འཛིན་བྱེད་བཞིན་མཉམ་བོད་མིའི་ཆོས་དང་རིག་གཞུང་གི་ངོ་བོ་གཅེས་སྲུང་འཚུད་པའི་ཕྱོགས་གཉིས་དབར་བསམ་ཚུལ་མི་མཐུན་པ་དང་སེམས་ཚབ་བྱ་རྒྱུའི་གནད་དོན་རྣམས་སེལ་སླད་ཏཱ་ལའི་བླ་མའི་སྐུ་ཚབ་དང་ལྷན་གྲོས་མོལ་རྒྱུན་མཐུད་ཡོང་རྒྱུར་ཨ་མེ་རི་ཀས་མུ་མཐུད་ནས་རྒྱབ་སྐྱོར་ཞུ་རྒྱུ་ཡིན།”

སྲིད་འཛིན་ཨོ་སྦ་མས་བོད་སྐོར་འགྲེལ་བརྗོད་གནང་བ་དེར་གོ་དོན་གཉིས་དང་ཆབ་སྲིད་སྔོན་བརྡ་གཅིག་ཡོད་པ་གུས་པའི་ཚོར་སྣང་ཡིན།
གོ་དོན་དང་པོ་དེ་ནི་རྒྱ་ནག་སྲིད་འཛིན་དང་གཞུང་ལ་བོད་ཀྱི་དཀའ་རྙོག་སྐོར་༧རྒྱལ་བ་རིན་པོ་ཆེའི་སྐུ་ཚབ་ལྷན་གྲོས་མོལ་བརྒྱུད་སེལ་དགོས་པའི་ཨ་མེ་རི་ཀའི་སྲིད་བྱུས་དེ་བསྐྱར་ནན་གནང་བ་དང་ཆབ་གཅིག་གྲོས་མོལ་རྒྱུན་མཐུད་བྱེད་དགོས་པའི་གོ་དོན་ཡིན། ༢༠༡༠ཟླ་༡ནང་འབྲེལ་མོལ་ཐེངས་༩གནང་རྗེས་ཕྱོཌ་གཉིས་དབར་ད་བར་འདུ་འཛོམས་བྱུང་མེད།
གོ་དོན་གཉིས་པ་དེ་ནི་སྲིད་འཛིན་ཨོ་སྦ་མས་བོད་སྐོར་འགྲེལ་བརྗོད་གནང་སྐབས་ཀྱི་ཁོར་ཡུག་དང་ངོ་བོ་དེ་དང་འབྲེལ་བ་ཡོད། ཡོངས་བསྒྲགས་གསར་འགོད་ལྷན་ཚོགས་ཞིག་གི་སར་དང་རྒྱ་ནག་སྲིད་འཛིན་གྱི་མདུན་གནང་བ་དེས་བོད་ཀྱི་གནད་དོན་དེ་ནི་སྲིད་འཛིན་ཨོ་སྦ་མ་དང་ཁོང་གི་སྲིད་གཞུང་ནས་ཨ་རི་དང་རྒྱ་ནག་གི་འབྲེལ་བའི་ཐོག་གལ་གནད་ཆེ་བ་ཞིག་རྩིས་གནང་གི་ཡོད་པ་སྟོན་ཆེད་ཡིན།

ཆབ་སྲིད་ཀྱི་སྔོན་བརྡ་གཅིག་དེ་ནི་བར་སྐབས་ནས་རྒྱ་ནག་གཞུང་ནས་བོད་དེ་རྒྱ་ནག་གི་གཞི་རྩའི་ཁེ་ཕན་ཡིན་པས་རྒྱལ་ཁབ་གཞན་ནས་དེ་ཐོག་རྒྱབ་སྐྱོར་ཕར་བཞག་འགྲེལ་བརྗོད་ཙམ་ཡང་བྱེད་ན་སྒྲིག་གི་མེད་ཟེར་བ་དེར་བརྡ་ལན་གསལ་པོ་རེད། སྲིད་འཛིན་ཨོ་སྦ་མས་བོད་སྐོར་རྒྱ་ནག་གི་གཞི་རྩའི་ཁེ་ཕན་གྱི་འགྲེལ་བརྗོད་དེར་ངོས་ལན་མ་གནང་བ་དང་བོད་ཀྱི་གནད་དོན་དེ་ཨ་མེ་རི་ཀའི་མི་མང་གི་འདོད་དོན་དང་འབྲེལ་བ་བཟོས་སོང་བསམ།
གང་ལྟར་སྲིད་འཛིན་ཨོ་སྦ་མས་བོད་སྐོར་བཀའ་མོལ་གནང་བ་དེ་ནི་ལེགས་པའི་རང་བཞིན་ཡིན་པ་དང་མ་འོངས་པར་དེ་ཐོག་གནས་སྟངས་གང་འདྲ་ཆགས་མིན་བལྟ་རྒྱུ་རེད།

ལྡི་ལི་ཁྲིམས་ཁང་ནས་བོད་མི་ཞིག་རྒྱ་གར་མི་སེར་ཡིན་མིན་ཐོག་ཁྲིམས་གཅོད་ཀྱི་སློབ་གསོ།

ལྡི་ལི་ཁྲིམས་ཁང་ཆེན་མོའི་ལས་རྟགས།

༢༠༡༠ ཟླ་༡༢ ཚེས་༢༢ ཉིན་ལྡི་ལིའི་ཁྲིམས་ཁང་ཆེན་མོས་བོད་རིགས་རྣམ་རྒྱལ་སྒྲོལ་དཀར་ལགས་ནས་རྒྱ་གར་ཕྱིར་བསྐྱོད་ལག་འཁྱེར་རག་མིན་སྐོར་ལ་ཁྲིམས་སའི་བཅད་མཚམས་གནང་བ་༼ཁྲིམས་གཅོད་ཨང་ W.P.(C) 12179/2009 ༽ དེར་རྒྱ་གར་ནང་འཁྲུངས་པའི་བོད་མི་ན་གཞོན་ཚང་མས་ཐུགས་སྣང་དགོས་པའི་གནད་དོན་ཞིག་རེད་འདུག
ཁྲིམས་བརྩོད་དེའི་སྙིང་དོན་ནི་རྒྱ་གར་དུ་སྐྱེ་བའི་བོད་ཁྲུག་ཞིག་ཁྲིམས་ཐོག་ནས་རྒྱ་གར་གྱི་ཆབ་འབངས་ལ་ངོས་འཛིན་བྱེད་ཀྱི་ཡོད་མིན་དེ་རེད།
ཁྲིམས་དཔོན་ནས་ཁྲིམས་གཅོད་གནང་བ་ལྟར་ན་གཤམ་གསལ་ཁག་གསལ་པོ་བཟོ་འདུག
༡༽ བོད་མི་ཞིག་གལ་ཏེ་རྒྱ་གར་ནང་༡༩༥༠ ཟླ་༡ ཚེས་༢༦རྗེས་དང་༡༩༨༧ཟླ་༧ཚེས་༡ གོང་ལ་སྐྱེ་ཡོད་ན་རྒྱ་གར་གྱི་ཆབ་འབངས་ཁྲིམས་ཡིག་༼ལེའུ་༣(༡)(ཀ་)༽གཞིར་བཟུང་གིས་རྒྱ་གར་གྱི་ཆབ་འབངས་ཡིན་པ་དང་དེ་དང་འབྲེལ་བའི་ཐོབ་ཐང་ཚང་མ་སྤྲད་དགོས་ཡོད།
༢༽དེ་འདྲ་བའི་ཆབ་འབངས་ཁྲིམས་ཡིག་༼ལེའུ་༣(༡)(ཀ་)༽གཞིར་བཟུང་གིས་རྒྱ་གར་གྱི་ཆབ་འབངས་ཡིན་པ་བོད་མི་ཞིག་ནས་རྒྱ་གར་ཆབ་འབངས་ཡོང་རྒྱུའི་སྙན་ཞུ་ཡང་འབུལ་དགོས་ཀྱི་མེད། ཁྲིམས་ཡིག་གི་ལེའུ་དེའི་ནང་རྒྱ་གར་ནང་༡༩༥༠ ཟླ་༡ ཚེས་༢༦རྗེས་དང་༡༩༨༧ཟླ་༧ཚེས་༡ གོང་ལ་སྐྱེ་བའི་གང་ཟག་སུ་རུང་རྒྱ་གར་གྱི་ཆབ་འབངས་ཡིན་གསལ་ཡོད།
༣༽ རྒྱ་གར་དབུས་ནང་སྲིད་ལས་ཁུངས་ནས་༡༩༥༩ཟླ་༣རྗེས་རྒྱ་གར་དུ་འབྱོར་བའི་བོད་མི་ཚོར་ཆབ་འབངས་ཁྲིམས་ཡིག་༼ལེའུ་༦(༡)༽གཞིར་བཟུང་གིས་ཆབ་འབངས་ཐོབ་ཐང་སྤྲོད་རྒྱུ་མིན་པའི་སྲིད་བྱུས་ཐག་གཅོད་དེ་གནད་དོན་འདིར་འབྲེལ་བ་མེད། ངས་འདིའི་གོ་དོན་ལེན་རྒྱུ་ནོར་མེད་ན་ཁྲིམས་ཁང་ནས་བོད་ནས་རྒྱ་གར་དུ་འབྱོར་བའི་བོད་མི་ཞིག་དང་རྒྱ་གར་དུ་སྐྱེ་བའི་བོད་མི་ཞིག་དབར་ཁྱད་པར་ཡོད་པ་སྟོན་གནང་ཡོད་འདུག
༤༽བོད་མི་ཞིག་ལ་ངོ་སྤྲོད་ལག་འཁྱེར་༼པ་སེ་སེར་པོའམ་IC༽ཡོད་པ་དེ་ནི་རྒྱ་གར་གྱི་ཕྱིར་བསྐྱོད་ལག་འཁྱེར་(Passport)མ་གནང་རྒྱུའི་ཁུངས་ལྡན་རྒྱུ་མཚན་མིན།

དེ་འདྲ་སོང་གོང་བརྗོད་དུས་ཚོད་ནང་རྒྱ་གར་དུ་སྐྱེ་བའི་བོད་མི་ཚོས་རྒྱ་གར་གྱི་ཆབ་འབངས་བཞེས་འདོད་ཡོད་ན་ཁྲིམས་གཅོད་འདི་ནི་བྱུང་སྲོལ་ལ་བཞག་ན་གོ་སྐབས་ཞིག་ཡོད་པ་མཐོང་། གལ་ཆེ་བའི་གནད་དོན་གཅིག་ནི་གང་ཟག་དེར་སྐྱེས་ཚེས་ལག་འཁྱེར་ཁུངས་ལྡན་དང་། ཁྲིམས་མཐུན། དེ་བཞིན་ངོས་འཛིན་བྱེད་ཐུབ་པ་ཞིག་དགོས་ཀྱི་ཡོད་པ་དེ་བརྗོད་མི་དགོས་པ་ཡིན།

གོང་གསལ་ལྡི་ལི་ཁྲིམས་ཁང་གི་ཁྲིམས་གཅོད་ཡིག་ཆ་ཚང་མ་འདིར་གཟིགས་ཐུབ།

༢༠༡༠ ལོའི་ནང་བོད་དང་འབྲེལ་བའི་གནས་ཚུལ་ཆེ་ཁག་ཐོག་གུས་པའི་དཔྱད་ཞིབ།

ཕྱི་ལོ་གསར་པ་འདིར་གུས་པའི་ཟིན་བྲིས་འདིར་ཕེབས་མཁན་ཚང་མར་འཚམས་འདྲི་ཞུ་རྒྱུ་དང་། ལོ་འདིར་སྐུ་ཉིད་ཀྱི་ལས་དོན་ཐམས་ཅད་དོན་སྙིང་ལྡན་པ་ཡོང་བའི་སྨོན་ལམ་ཡོད།
འདས་མ་ཐག་པའི་ལོའི་ནང་བོད་དང་འབྲེལ་བའི་གནས་ཚུལ་བྱུང་བ་དབྱེ་བ་གཉིས་སུ་ཕྱེ་ཆོག་འདུག གཅིག་ནི་ཆབ་སྲིད་དང་འབྲེལ་བའི་གནས་ཚུལ་དང་གཉིས་པ་དེ་ནི་སྤྱི་ཚོགས་དང་འབྲེལ་བའི་གནས་ཚུལ་ཡིན།

ཆབ་སྲིད་དང་འབྲེལ་བའི་གནས་ཚུལ་ལ་ཞིག་ན་གཤམ་འཁོད་རྣམས་༢༠༡༠ ལོའི་གལ་ཆེ་བའི་དོན་ཚན་ཡིན།

༡༽ཕྱི་ཟླ་དང་པོའི་ནང་༧གོང་ས་མཆོག་གི་སྐུ་ཚབ་དང་རྒྱ་ནག་གཞུང་གི་སྐུ་ཚབ་ལྷན་འབྲེལ་མོལ་ཐེངས་དགུ་པ་དེ་གནང་སྐབས་བོད་མིའི་ངོས་ནས་དེ་སྔའི་”བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཡིག་ཆ་” དེ་ཐོག་འགྲེལ་བཤད་ཀྱི་ཡིག་ཆ་རྒྱ་ནག་སྐུ་ཚབ་ལ་གནང་ཡོད་པ་རེད། ཡིག་ཆ་དེས་བོད་ཀྱི་མ་འོངས་པའི་ཐོག་༧གོང་ས་མཆོག་གི་དགོངས་པ་བཞེས་ཕྱོགས་དེ་གསལ་དུ་བཟོ་ཡོད་པ་རེད།

༢༽ ཕྱི་ཟླ་གཉིས་པའི་ནང་༧གོང་ས་མཆོག་ཨ་མེ་རི་ཀའི་རྒྱལ་ས་ཝ་ཤིང་ཊོན་དུ་ཆིབས་བསྒྱུར་གནང་ནས་སྲིད་འཛིན་ཨོ་སྦ་མ་མཇལ་གནང་བ་དང་། དེ་རྗེས་ཕོ་བྲང་དཀར་པོ་ནས་ཡོང་ཁྱབ་གསལ་བསྒྲགས་ཞིག་ནང་༧གོང་ས་མཆོག་གི་ལམ་དབུ་མར་སྲིད་འཛིན་ཨོ་སྦ་མས་རྒྱབ་སྐྱོར་གནང་གི་ཡོད་པ་གསུངས་ཡོད། དེ་ནི་ཨ་རིའི་སྲིད་འཛིན་ཞིག་གི་ངོས་ནས་དབུ་མའི་ལམ་ལ་ཡིག་ཐོག་ནས་རྒྱབ་སྐྱོར་གསལ་པོ་གསུངས་པ་དང་པོ་ཡིན།

༣༽ཟླ་བ་ལྔ་པ་དང་བརྒྱད་པའི་ནང་༧གོང་ས་མཆོག་ནས་དྲ་རྒྱའི་འཕྲུལ་སྒྲ་བརྒྱུད་རྒྱ་རིགས་ཚོའི་དྲི་བར་བཀའ་ལན་གནང་བ་དེས་མགོན་པོ་གང་ཉིད་དང་རྒྱ་རིགས་མང་ཚོགས་དབར་ཐད་ཀའི་འབྲེལ་བ་མཚོན་པ་དང་དེས་རྒྱ་རིགས་དང་རྒྱལ་སྤྱིའི་ནང་བག་ཆགས་དམིགས་བསལ་ཞིག་བྱུང་ཡོད།

Continue reading “༢༠༡༠ ལོའི་ནང་བོད་དང་འབྲེལ་བའི་གནས་ཚུལ་ཆེ་ཁག་ཐོག་གུས་པའི་དཔྱད་ཞིབ།”